14 ಅಕ್ಟೋಬರ್: ಫೇಸ್ಬುಕ್ ಪೋಸ್ಟ್
ನಾನು ಆಗಾಗ ನಮ್ಮ ಕಂಪನಿಯಲ್ಲಿ ಅಥವಾ ಬೇರೆ ಕಂಪನಿಗಳಲ್ಲಿ ನನಗೆ ನೇರವಾಗಿ ಗೊತ್ತಿರುವಲ್ಲಿ ಉದ್ಯೋಗಾವಕಾಶಗಳಿದ್ದಲ್ಲಿ ಆ ಮಾಹಿತಿ ಹಂಚಿಕೊಂಡು ಆಸಕ್ತರು ರೆಸ್ಯೂಮೆ ಕಳಿಸಲು ಹೇಳುತ್ತಿರುತ್ತೇನೆ. ನಮ್ಮ ಕರ್ನಾಟಕದ ಅಭ್ಯರ್ಥಿಗಳಿಗೆ ಪ್ರಯೋಜನವಾಗಲಿ ಮತ್ತು ಯೋಗ್ಯ ಅಭ್ಯರ್ಥಿಗಳು ಸಿಗಲಿ ಎಂಬುದು ಅದರ ಉದ್ದೇಶ. ಆದರೆ ಹಲವರು ಎಷ್ಟು ಉಡಾಫೆಯಿಂದ ರೆಸ್ಯೂಮೆ ಕಳಿಸುತ್ತಾರೆ ಅಂದರೆ ಅದು ಬೇಸರ ತರಿಸುತ್ತದೆ. ಯಾವ ಹುದ್ದೆಗಳಿವೆ, ಅದರ ಅಗತ್ಯಗಳೇನು ಎಂಬುದನ್ನು ಗಮನಿಸದೇ, ತಾವು ಯಾವ ಹುದ್ದೆಗೆ ಅರ್ಜಿ ಹಾಕಲು ಬಯಸುತ್ತೇವೆ ಎಂಬುದನ್ನೂ ಬರೆಯದೇ ಒಟ್ನಲ್ಲಿ ತಗೊಂಡ್ರೆ ತಗೊಳ್ಲಿ ಎನ್ನುವಂತೆ ಕಳಿಸುತ್ತಾರೆ. ಅಂತಹ ರೆಸ್ಯೂಮೆ ತೆಗೆದು ನೋಡಲೂ ಮನಸ್ಸಾಗುವುದಿಲ್ಲ. ಬರುವ ಹತ್ತಾರು ಇಮೇಲುಗಳನ್ನು ತೆಗೆದು ಅದರಲ್ಲಿ ರೆಸ್ಯೂಮೆ ಪರಿಶೀಲಿಸಿ ಅವರು ಯಾರು, ಏನು ಓದಿದ್ದಾರೆ, ಯಾವ ಉದ್ಯೋಗಕ್ಕೆ ಅವರ ಅನುಭವ, ಸ್ಕಿಲ್ ಸೆಟ್ ಹೊಂದಿಕೆಯಾಗುತ್ತದೆ ಅಂತೆಲ್ಲಾ ನೋಡಿಕೊಂಡು ಕೂರಲು ಖಂಡಿತ ಆಗುವುದಿಲ್ಲ. ನನ್ನ ಕ್ಷೇತ್ರದ್ದಲ್ಲದ ಉದ್ಯೋಗಗಳಿದ್ದಲ್ಲಿ ಅದೆಲ್ಲಾ ನನಗೆ ತಿಳಿಯುವುದೂ ಇಲ್ಲ. ಉದಾಹರಣೆಗೆ ಇದರೊಂದಿಗಿರುವ ಚಿತ್ರದಲ್ಲಿ ಎರಡು ಇಮೇಲುಗಳನ್ನು ನೋಡಬಹುದು, ಒಂದರಲ್ಲಿ ಏನು ಎತ್ತ ಯಾವುದಕ್ಕೆ ಅರ್ಜಿ ಎಂಬ ಯಾವ ಮಾಹಿತಿ ಇಲ್ಲ, ಇನ್ನೊಂದರಲ್ಲಿ ಒಬ್ಬ ಒಂದು ಫೇಕ್ ರೆಸ್ಯೂಮೆ ರೆಡಿಮಾಡಿ ಅದನ್ನು 'ಫೇಕ್' ಅಂತಲೇ ಹೆಸರಿಟ್ಟು ಕಳಿಸಿದ್ದಾನೆ. ಇವತ್ತೊಂದು ಇಮೇಲ್ ಬಂದಿದೆ. ಅದರಲ್ಲಿ ಒಬ್ಬ ರೆಸ್ಯೂಮ್ ಕಳಿಸಿ "ನಿಮಗೆ ಇದು relevant ಇದೆಯಾ ನೋಡಿಕೊಳ್ಳಿ" ಎಂಬಂತೆ ಬರೆದು ಕಳಿಸಿದ್ದಾನೆ. ಮೆಕ್ಯಾನಿಕಲ್ ಫೀಲ್ಡಿನವನಾದ ನಾನು ಕಾಮರ್ಸ್ ಫೀಲ್ಡಿನ ರಿಲೆವೆನ್ಸ್ ಚೆಕ್ ಮಾಡಿ ಅವನನ್ನು ಕರೆಯಲು ನನಗ್ಯಾವ ಕರ್ಮ!
ಇನ್ನೊಂದಿಷ್ಟು ಜನ ಯಾರೋ ಹೇಳಿದರು ಅಂತ ರೆಸ್ಯೂಮೆಯನ್ನು ಸುಮ್ಮನೇ ಫಾರ್ವರ್ಡ್ ಮಾಡುತ್ತಾರೆ. ಅದಕ್ಕೆ ಹಿಂದಿರುವುದಿಲ್ಲ, ಮುಂದಿರುವುದಿಲ್ಲ, ಸಬ್ಜೆಕ್ಟ್ ಲೈನಿನಲ್ಲಿ FWD: ಎಂದೇ ಇರುತ್ತದೆ. ರೆಸ್ಯೂಮೆ ಫೈಲಿನ ಹೆಸರು resume ಅಂತಲೊ, resume_updated ಅಂತಲೊ ಇರುತ್ತದೆ. ಇಂತಹ ಹಲವು ಬಗೆಬಗೆಯ ಉಡಾಫೆಯ ಇಮೇಲುಗಳು, ರೆಸ್ಯೂಮೆಗಳು ಬರುತ್ತವೆ. ಇಷ್ಟೂ ಸೀರಿಯಸ್ನೆಸ್ ಇಲ್ಲದ ಒಬ್ಬ unknown personನನ್ನು ಉದ್ಯೋಗ ಸಂದರ್ಶನಕ್ಕೆ ಪರಿಗಣಿಸುವುದಾದರೂ ಹೇಗೆ?! ಆದ್ದರಿಂದ ಅವರಿಗೆ ಅರ್ಹತೆ ಇದ್ದರೂ ಸಹ ಕಳಿಸಿದ್ದು ವ್ಯರ್ಥವಾಗುತ್ತದೆ. ಪರಿಣಾಮವೆಂದರೆ, ಎಲ್ಲಾ ಹುದ್ದೆಗಳಿಗೂ ಬೇರೆರಾಜ್ಯದ ಅಭ್ಯರ್ಥಿಗಳು ಹೆಚ್ಚು ಆಯ್ಕೆಯಾಗುತ್ತಾರೆ. ಎಲ್ಲೂ ಕನ್ನಡವರನ್ನ ತಗೊಳ್ಳಲ್ಲ ಅಂತ ನಾವು ಹೊಯ್ಕೊತಿರಬೇಕಷ್ಟೆ.
ನಮ್ಮ ಕರ್ನಾಟಕದ ಹಲವಾರು ಅಭ್ಯರ್ಥಿಗಳು, ಅದರಲ್ಲೂ ಜೂನಿಯರ್ ಗಳು, ಕಡಿಮೆ ಅನುಭವವಿರುವವರು, ಹೊಸಬರು ಉದ್ಯೋಗಾವಕಾಶಗಳಿಗೆ ರೆಸ್ಯುಮೆ ಕಳಿಸುವುದು ಹೇಗೆ ಎನ್ನುವ ಬೇಸಿಕ್ ತಿಳುವಳಿಕೆ ಹೊಂದುವ, ಈ ಒಂದು ಸೌಜನ್ಯವನ್ನು ಕಲಿಯುವ ಅವಶ್ಯಕತೆ ಬಹಳ ಇದೆ.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ