ನಮ್ಮ ಮನೆಗಳಿಗೆ ವಿದ್ಯುತ್ ಹೇಗೆ ತಲುಪುತ್ತದೆ?

ಬೆಂಗಳೂರು ವಿದ್ಯುತ್ ಸರಬರಾಜು ಕಂಪೆನಿ(BESCOM)ಯ  M.D. ಆಗಿದ್ದ ಮಣಿವಣ್ಣನ್  ಅವರು ವಿದ್ಯುತ್ ಉತ್ಪಾದನಾ ಕೇಂದ್ರಗಳಲ್ಲಿ ಉತ್ಪಾದನೆಯಾದ ವಿದ್ಯುತ್ ಬೆಂಗಳೂರಿನಲ್ಲಿರುವ ಮನೆಗಳಿಗೆ ಬಂದು ತಲುಪುವುದು ಹೇಗೆ ಎಂಬುದರ ಬಗ್ಗೆ ಹಿಂದೊಮ್ಮೆ ಇಂಗ್ಲೀಷಿನಲ್ಲಿ ಬರೆದಿದ್ದರು. ಜನರಿಗೆ ಅರಿವು ಮೂಡಿಸುವುದಕ್ಕಾಗಿ ಬರೆದಿದ್ದ ಆ ಮಾಹಿತಿ ಬರಹವು ಇನ್ನೂ ಹೆಚ್ಚಿನ ಜನರಿಗೆ ತಲುಪಲಿ ಎಂಬ ಉದ್ದೇಶದಿಂದ ನಾನು ಕನ್ನಡಕ್ಕೆ ತರ್ಜುಮೆ ಮಾಡಿಕೊಟ್ಟಿದ್ದೆ. ಅದನ್ನು ಇಲ್ಲಿ ಹಾಕುತ್ತಿದ್ದೇನೆ. ಸಾಮಾನ್ಯ ಓದುಗರಿಗೂ ಅರ್ಥವಾಗುವುದಕ್ಕಾಗಿ ಅಗತ್ಯವಿದ್ದಷ್ಟೇ ಮಾತ್ರ ತಾಂತ್ರಿಕ ವಿಷಯಗಳನ್ನು ಇದರಲ್ಲಿ ಹೇಳಲಾಗಿದೆ. 

ನಮ್ಮ ಮನೆಗೆ ವಿದ್ಯುತ್ತು ಹೇಗೆ ಬರುತ್ತದೆ ಎನ್ನುವುದು ಬಹಳ ಆಸಕ್ತಿಯ ವಿಷಯ. ಇದನ್ನು ತಿಳಿದುಕೊಳ್ಳುವುದೂ ಮುಖ್ಯ. ಇದನ್ನು ತಿಳಿದುಕೊಳ್ಳುವುದರಿಂದ ಮನೆಗೆ ವಿದ್ಯುತ್ ಪೂರೈಕೆಯಲ್ಲಾಗುವ ಏರುಪೇರಿನ ಬಗ್ಗೆಯೂ ಗೊತ್ತಾಗುತ್ತದೆ.  ಕೆಲವೊಮ್ಮೆ ವಿದ್ಯುತ್ ಸರಬರಾಜು ಏಕೆ ಕೈಕೊಡುತ್ತದೆ ಎಂಬ ವಿಷಯ ಇದರಿಂದ ಮನದಟ್ಟಾಗುತ್ತದೆ. ರಾಯಚೂರು ಉಷ್ಣ ವಿದ್ಯುತ್ ಸ್ಥಾವರ(RTPS)ದಲ್ಲಿ (ಅಥವಾ ಬೇರೆ ಯಾವುದೇ ಕಡೆ) ಉತ್ಪಾದನೆಯಾದ ವಿದ್ಯುತ್ ಐದು ಹಂತಗಳಲ್ಲಿ ನಮ್ಮ ಮನೆಗಳಿಗೆ ತಲುಪುತ್ತದೆ.

೧. ಮೊದಲ ಹಂತವೆಂದರೆ RTPSನಿಂದ ಬೆಂಗಳೂರಿಗೆ ಸಾಗಣೆ. ಈ ವಿದ್ಯುತ್ ಸಾಗಣೆ ೪೦೦KV (ಕಿಲೋ ವೋಲ್ಟ್ಸ್) ಯಷ್ಟು ಹೈವೋಲ್ಟೇಜಿನಲ್ಲಾಗುತ್ತದೆ. ನೆಲಮಂಗಲ/ಪೀಣ್ಯ ರಸ್ತೆಯಲ್ಲಿ ಬರುವಾಗ ಕಾಣಿಸುವ ದೊಡ್ಡ ವಿದ್ಯುತ್ ಗೋಪುರಗಳೇ ಈ ೪೦೦KV ವಿದ್ಯುತ್ತನ್ನು ಸಾಗಿಸುವಂತವು. ಈ ವಿದ್ಯುತ್ ಲೈನುಗಳು ’ಮಾಸ್ಟರ್ ರೀಸಿವಿಂಗ್ ಸ್ಟೇಷನ್ನು’ಗಳೆಂದು ಕರೆಯಲ್ಪಡುವ ದೊಡ್ಡ ವಿದ್ಯುತ್ ಸ್ಟೇಶನ್ನುಗಳನ್ನು ತಲುಪುತ್ತವೆ. ಇಲ್ಲಿ ದೊಡ್ಡ ದೊಡ್ಡ ಟ್ರಾನ್ಸ್ ಫಾರ್ಮರುಗಳು ೪೦೦KV ವಿದ್ಯುತ್ತನ್ನು ೨೨೦KVಗೆ ಇಳಿಸುತ್ತವೆ. ಈ ಟ್ರಾನ್ಸ್ ಫಾರ್ಮರುಗಳನ್ನು ಪವರ್ ಟ್ರಾನ್ಸ್ ಫಾರ್ಮರುಗಳೆನ್ನುತ್ತಾರೆ. ಇವುಗಳ ಸಾಮರ್ಥ್ಯ ೫೦೦ ಮೆಗಾವ್ಯಾಟ್. ಅಂದರೆ ಕಾಲುಭಾಗ ಬೆಂಗಳೂರಿಗೆ ಸಾಕಾಗುವಷ್ಟಿರುತ್ತದೆ. ಇವು ಮನೆಯ ಜಗಲಿಯಷ್ಟು ದೊಡ್ಡದಾಗಿರುತ್ತವೆ. ಬೆಂಗಳೂರಿಗಾಗಿ ಇಂತಹ ಮೂರು ೪೦೦KV. ಮಾಸ್ಟರ್ ರಿಸೀವಿಂಗ್ ಸ್ಟೇಶನ್ನುಗಳಿವೆ. ಉತ್ತರಭಾಗದಲ್ಲಿ ನೆಲಮಂಗಲ, ಪೂರ್ವದಲ್ಲಿ ಹೂಡಿ, ದಕ್ಷಿಣದಲ್ಲಿ ಸೋಮನಹಳ್ಳಿ. ಈ ಸ್ಟೇಶನ್ನುಗಳಲ್ಲಿ ತೊಂದರೆಯಾದರೆ (ಟ್ರಿಪ್) ನಗರದ ವಿದ್ಯುತ್ ಪೂರೈಕೆಯಲ್ಲಿ ಭಾರೀ ಏರುಪೇರಾಗುತ್ತದೆ.  


೨. ಎರಡನೇ ಹಂತದಲ್ಲಿ, ಈ ಮಾಸ್ಟರ್ ರಿಸೀವಿಂಗ್ ಸ್ಟೇಷನ್ನುಗಳಿಂದ ಹೊರಬರುವ ೨೨೦KV ವಿದ್ಯುತ್ತನ್ನು ನಗರದ ಬೇರೆ ಬೇರೆ ಭಾಗಗಳಲ್ಲಿರುವ ’ರಿಸೀವಿಂಗ್ ಸ್ಟೇಶನ್ನು’ಗಳಿಗೆ ಕಳಿಸಲಾಗುತ್ತದೆ. ಈ ರಿಸೀವಿಂಗ್ ಸ್ಟೇಶನ್ನುಗಳಲ್ಲಿ ಈ ವಿದ್ಯುತ್ತನ್ನು ೬೬KVಗೆ ಇಳಿಸಲಾಗುತ್ತದೆ. ಇಲ್ಲಿಯೂ ಕೂಡ ಪವರ್ ಟ್ರಾನ್ಸ್ ಫಾರ್ಮರುಗಳು ಈ ಕೆಲಸವನ್ನು ಮಾಡುತ್ತವೆ. ಬೆಂಗಳೂರಿನಲ್ಲಿ ಇಂತಹ ಹದಿನೈದು ರಿಸೀವಿಂಗ್ ಸ್ಟೇಶನ್ನುಗಳಿವೆ.

೩. ಮೂರನೇ ಹಂತದಲ್ಲಿ, ೬೬KVಗೆ ಇಳಿಸಲ್ಪಟ್ಟ ಈ ವಿದ್ಯುತ್ ರಿಸೀವಿಂಗ್ ಸ್ಟೇಶನ್ನುಗಳಿಂದ ’ಸಬ್ ಸ್ಟೇಶನ್ನು’ಗಳಿಗೆ ಹೋಗುತ್ತದೆ. ಈ ಸಾಗಣೆಯನ್ನು ಸಣ್ಣ ಟವರ್ ಗಳ ಮೂಲಕ ಅಥವಾ ನೆಲದೊಳಗೆ ಸಾಗುವ ಕೇಬಲ್ ಗಳ ಮೂಲಕ ಮಾಡಬಹುದು. ಈ ಸಬ್ ಸ್ಟೇಶನ್ನುಗಳಲ್ಲಿ ಟ್ರಾನ್ಸ್ ಫಾರ್ಮರುಗಳ ಮೂಲಕ ಈ ೬೬KV. ವಿದ್ಯುತ್ ೧೧KVಗೆ ಇಳಿಸಲ್ಪಡುತ್ತದೆ. ಬೆಂಗಳೂರಲ್ಲಿ ಇಂತಹ ತೊಂಭತ್ತು ಸಬ್ ಸ್ಟೇಶನ್ನುಗಳಿವೆ.

೪. ನಾಲ್ಕನೇ ಹಂತದಲ್ಲಿ, ಈ ವಿದ್ಯುತ್ ’ಫೀಡರ್ಸ್’ ಎಂದು ಕರೆಯಲ್ಪಡುವ ಲೈನುಗಳ ಮೂಲಕ ಸಬ್ ಸ್ಟೇಶನ್ನುಗಳಿಂದ ಹೊರಹೋಗುತ್ತದೆ. ಪ್ರತಿಯೊಂದು ಸಬ್ ಸ್ಟೇಶನ್ನುಗಳಿಂದ ಇಂತಹ ೧೦-೧೫ ಫೀಡರ್ ಲೈನುಗಳು ಹೊರಬಂದು ಬೇರೆ ಬೇರೆ ಕಡೆಯಲ್ಲಿರುವ ಟ್ರಾನ್ಸ್ ಫಾರ್ಮರುಗಳಿಗೆ ಸಂಪರ್ಕಗೊಳ್ಳುತ್ತವೆ. ಇವೇ ನಾವು ರಸ್ತೆ ಬದಿಯಲ್ಲಿ ಕಾಣುವಂತಹ ಟ್ರಾನ್ಸ್ ಫಾರ್ಮರುಗಳು. ಇದನ್ನು ’ಡಿಸ್ಟ್ರಿಬ್ಯೂಶನ್ ಟ್ರಾನ್ಸ್ ಫಾರ್ಮರ್ ಸೆಂಟರ್ಸ್’ (DTC) ಎಂದು ಕರೆಯುತ್ತಾರೆ. ಈ ಟ್ರಾನ್ಸ್ ಫಾರ್ಮರುಗಳಲ್ಲಿ ವಿದ್ಯುತ್ತು ೪೪೦ ವೋಲ್ಟ್ ಗಳಿಗೆ ಇಳಿಕೆಯಾಗುತ್ತದೆ. 

೫. ಐದನೇ ಹಂತದಲ್ಲಿ, ಈ ೪೪೦ ವೋಲ್ಟ್ ಲೈನುಗಳು ಟ್ರಾನ್ಸ್ ಫಾರ್ಮರುಗಳಿಂದ ಹೊರಟು ಕೊನೆಯದಾಗಿ ನಿಮ್ಮ ಮನೆಯ ಮೀಟರಿಗೆ/ಮೇನ್ ಸ್ವಿಚ್ ಬೋರ್ಡಿಗೆ ಬಂದು ಸೇರುತ್ತವೆ. ಟ್ರಾನ್ಸ್ ಫಾರ್ಮರ್ ಗಳಿಂದ ಮೂರು ತಂತಿಗಳ ಮೂಲಕ ವಿದ್ಯುತ್ ಪಡೆಯಬಹುದು (ಮೂರೂ ಬೇರೆ ಬೇರೆ ಫೇಸ್ ಗಳಲ್ಲಿರುತ್ತವೆ). ಮನೆಯ ಬಳಕೆಗೆ ೨೨೦ ವೋಲ್ಟ್ಸ್ ವಿದ್ಯುತ್ ಸಾಕು. ಹಾಗಾಗಿ ಒಂದು ತಂತಿಯನ್ನು ಮಾತ್ರ ಸಂಪರ್ಕಿಸಲಾಗುತ್ತದೆ. 

(From the transformer, we get electricity in 3 lines, each carrying current in 3 different phases. The voltage between any two phase will be 440 volts. But, the voltage between any phase to the earth will be 220 volts! Thus, for your home, they will send only one wire carrying 220 volts! If you require 2 phase supply, then all 3 wires will come)

ಈ ಐದೂ ಹಂತಗಳಲ್ಲಿ ವಿದ್ಯುತ್ ಸುಮಾರು ಸಾವಿರ ಕಿಲೋಮೀಟರ್ ಲೈನುಗಳ ಮೂಲಕ, ನೂರಾರು ಉಪಕರಣಗಳು ಹಾಗೂ ನಟ್ ಬೋಲ್ಟುಗಳ ಮೂಲಕ ಹಾದು ಬರುತ್ತದೆ. ಇದಿಷ್ಟೂ ದೂರದ ಸಾಗಾಣಿಕೆಯಲ್ಲಿ ಯಾವುದೋ ಒಂದು ಸಣ್ಣ ತೊಂದರೆಯೂ ಕೂಡ ವಿದ್ಯುತ್ ಸರಬರಾಜಿಗೆ ತಡೆಯಾಗಬಲ್ಲುದು.

ಈ ಪ್ರಯಾಣದಲ್ಲಿ ಮೊದಲ ಮೂರು ಹಂತಗಳು ಕರ್ನಾಟಕ ವಿದ್ಯುತ್‌  ಪ್ರಸರಣಾ ನಿಗಮದ (KPTCL) ಆಡಳಿತ ವ್ಯಾಪ್ತಿಗೆ ಬರುತ್ತದೆ. ೬೬KVವರೆಗಿನ ಸರಬರಾಜಲ್ಲಿ ಆಗುವ ತೊಂದರೆಗಳನ್ನು KPTCLನವರು ನೋಡಿಕೊಳ್ಳುತ್ತಾರೆ. ಕೊನೆಯ ಎರಡು ಹಂತಗಳು ಬೆಂಗಳೂರು ವಿದ್ಯುತ್‌ ಸರಬರಾಜು ಕಂಪನಿ (ಬೆಸ್ಕಾಂ) ಅಡಿಯಲ್ಲಿ ಬರುತ್ತವೆ. ಅಂದರೆ ಸಬ್ ಸ್ಟೇಶನ್ನುಗಳಿಂದ ನಮ್ಮ ಮನೆಯವರೆಗಿನ ಸರಬರಾಜು ಬೆಸ್ಕಾಂಗೆ ಸೇರಿದ್ದು. ಮೊದಲ ಎರಡು ಹಂತಗಳು ಬಹಳ ಹೈ  ವೋಲ್ಟೇಜಿನಲ್ಲಿ ಆಗುವುದರಿಂದ ಅದನ್ನು ನೆಲದಡಿಯಲ್ಲಿ ಮಾಡಲು ಸಾಧ್ಯವಿಲ್ಲ. ಆದರೆ ಕೊನೆಯ ಎರಡು ಹಂತಗಳ ಪ್ರಸರಣವನ್ನು ನೆಲದಡಿಯ ಕೇಬಲ್ಲುಗಳ ಮೂಲಕ ಮಾಡಲಾಗುತ್ತದೆ.

ಮೊದಲ ಹಂತದಲ್ಲಿ ಹೇಳಿರುವ ಎಲ್ಲಾ ೪೦೦KV ಪವರ್ ಲೈನ್ ಗಳು ಮತ್ತು ೪೦೦KV ಮಾಸ್ಟರ್ ರಿಸೀವಿಂಗ್ ಸ್ಟೇಶನ್ ಗಳು ಸಾಮಾನ್ಯವಾಗಿ ನ್ಯಾಶನಲ್ ಪವರ್ ಗ್ರಿಡ್ ಜಾಲದಲ್ಲಿರುತ್ತವೆ. ಈ ರೀತಿಯಾಗಿ, ನಮಗೆ ಇಪ್ಪತ್ನಾಲ್ಕು ಗಂಟೆ ವಿದ್ಯುತ್ ಪೂರೈಕೆಯಾಗಲು RTPS (ಅಥವಾ ಇನ್ಯಾವುದೇ ಉತ್ಪಾದನಾ ಘಟಕ), KPTCL ಹಾಗೂ BESCOMಗಳು ಒಟ್ಟಿಗೆ ಕೆಲಸ ಮಾಡಬೇಕಾಗುತ್ತದೆ. ಈ ಎಲ್ಲಾ ಇಲಾಖೆಗಳಲ್ಲಿಯೂ ಹಗಲುರಾತ್ರಿ ಕೆಲಸ ನಡೆಯುತ್ತಿರುತ್ತದೆ.

******

ವಿದ್ಯುತ್ ಉತ್ಪಾದನೆ ಹಾಗೂ ಸರಬರಾಜಿನ ಹಿಂದಿರುವ ಸಂಪನ್ಮೂಲ ಮತ್ತು ಶ್ರಮವನ್ನು ಗಮನದಲ್ಲಿರಿಸಿಕೊಂಡು ವಿದ್ಯುತ್ತನ್ನು ಸದ್ಬಳಕೆ ಮಾಡೋಣ ಮತ್ತು ಪೋಲು ಮಾಡದಿರೋಣ. :)

ಮೂಲ ಇಂಗ್ಲೀಶ್ ಬರಹ ಇಲ್ಲಿದೆ: How electricity reaches our homes.

ಮಣಿವಣ್ಣನ್ ಅವರ ಬ್ಲಾಗ್ ಇದು: I and the Government..?

ಬ್ಲಾಗ್ - ಬರವಣಿಗೆಯ ಮೆರವಣಿಗೆ

ಬ್ಲಾಗಿಂಗ್ ಕಡಿಮೆಯಾಗುತ್ತಿರುವ ಈ ಸಂದರ್ಭದಲ್ಲಿ ಹೊಸಬರಿಗೆ ಬ್ಲಾಗಿಂಗ್ ಬಗ್ಗೆ ಪರಿಚಯಿಸಲು, ೨೬ ಫೆಬ್ರವರಿ ೨೦೧೪ರಂದು 'ವಿಜಯವಾಣಿ' ಪತ್ರಿಕೆಯಲ್ಲಿ ಪ್ರಕಟವಾದ ನನ್ನ ಬರಹ.

ಇಂಟರ್ನೆಟ್ ಇವತ್ತು ಯುವಜನಾಂಗಕ್ಕೆಲ್ಲಾ ಚಿರಪರಿಚಿತೆ. ಹೊತ್ತುಕಳೆಯಲು ಎಷ್ಟು ಬಳಕೆಯಾಗುತ್ತದೆಯೋ, ಅಷ್ಟೇ ಒಳ್ಳೆಯ ರೀತಿಯಲ್ಲಿ ಸಂವಹನಕ್ಕೂ, ಮಾಹಿತಿ ವಿನಿಮಯಕ್ಕೂ ಬಳಕೆಯಾಗುತ್ತದೆ. ಇದೊಂದು ಮುಕ್ತಮಾಧ್ಯಮವೂ ಹೌದು. ನೀವು ಎಲ್ಲೋ ಪ್ರವಾಸ ಹೋಗಿಬರುತ್ತೀರ, ಸಿನೆಮಾ ನೋಡುತ್ತೀರ, ಪುಸ್ತಕ ಓದುತ್ತೀರ, ದಿನನಿತ್ಯದ ಜೀವನದಲ್ಲಿ ಹಲವು ಅನುಭವಗಳಾಗುತ್ತವೆ, ಬಾಲ್ಯದ ನೆನಪುಗಳಿರುತ್ತವೆ, ಸುಂದರ ಕನಸುಗಳಿರುತ್ತವೆ. ಬರವಣಿಗೆ ಬಗ್ಗೆ ಸ್ವಲ್ಪ ಒಲವಿದ್ದರೂ ಸಾಕು, ಎಲ್ಲಾ ಬರೆದು ದಾಖಲಿಸಬೇಕು ಅನ್ನಿಸುತ್ತದೆ.. ಬರೀ ಇಷ್ಟೇ ಅಲ್ಲ, ಹಲವರಿಗೆ ದಿನಚರಿ ಬರೆಯುವ ಅಭ್ಯಾಸವಿರುತ್ತದೆ, ಕತೆ, ಕವನ ಬರೆಯುವ ಹವ್ಯಾಸವಿರುತ್ತದೆ. ಸೃಜನಾತ್ಮಕ ಬರವಣಿಗೆ ಮಾಡುವ ಸಾಮರ್ಥ್ಯವಿರುತ್ತದೆ, ಯಾವುದೋ ವಿಷಯದ ಬಗ್ಗೆ ಅಭಿಪ್ರಾಯ ಹೇಳಬೇಕಿರುತ್ತದೆ, ತಮ್ಮ ಪರಿಸರದಿಂದ, ಉದ್ಯೋಗದಿಂದ, ಅನುಭವದಿಂದ, ಹಿರಿಯರಿಂದ ಅನೇಕ ಮಾಹಿತಿಗಳು ಮತ್ತು ಜ್ಞಾನವು ಗೊತ್ತಿರುತ್ತವೆ. ಅವುಗಳನ್ನು ನಾವೇ ಇಟ್ಟುಕೊಂಡರೆ ಏನು ಪ್ರಯೋಜನ. ಅದು ಹಲವರನ್ನು ತಲುಪಿದರೆ ಉಪಯೋಗವಾಗಬಹುದು. ಅದನ್ನು ಬರೆದ ಮೇಲೆ ನಾಲ್ಕು ಜನ ಓದುವಂತಾಗಬೇಕು. ಹಾಗೆ ಓದುವಂತೆ ಮಾಡುವುದು ಹೇಗೆ? ಪುಸ್ತಕದಲ್ಲಿ ಬರೆದಿಟ್ಟುಕೊಂಡರೆ ನಿಮ್ಮ ಆಪ್ತ ಬಳಗದಲ್ಲಿರುವ ಆಸಕ್ತರಿಗೆ ಮಾತ್ರ ಓದಿಸಬಹುದು. ಪತ್ರಿಕೆಗಳಿಗೆ ಕಳಿಸಿದರೆ ಪ್ರಕಟವಾಗುತ್ತದೋ ಇಲ್ಲವೋ ಎಂದು ಖಾತ್ರಿ ಇರುವುದಿಲ್ಲ. ಹಾಗಿದ್ದರೆ ಏನು ಮಾಡುವುದು ಎಂಬ ಪ್ರಶ್ನೆಗೆ ಉತ್ತರ ಎಂದರೆ ಬ್ಲಾಗಿಂಗ್.

ಫೇಸ್ಬುಕ್ ಮತ್ತು ಬ್ಲಾಗ್: ಫೇಸ್ ಬುಕ್ , ಟ್ವಿಟ್ಟರ್ ಮುಂತಾದ ಸಾಮಾಜಿಕ ತಾಣಗಳಲ್ಲಿ ತಮಗನಿಸಿದ್ದನ್ನು ಬರೆದುಹಾಕಿ ಅದಕ್ಕೆ ಮೆಚ್ಚುಗೆಗಳನ್ನು, ಒಕ್ಕಣೆಗಳನ್ನು ಪಡೆಯುವುದು ನಮಗೆಲ್ಲಾ ತಿಳಿದಿರುವಂತದ್ದು. ಆದರೆ ಈ ಸಾಮಾಜಿಕ ತಾಣಗಳಲ್ಲಿ ಇರುವ ಕೊರತೆ ಎಂದರೆ ಇವು ಹೆಚ್ಚಾಗಿ ಚುಟುಕು ಬರಹಗಳಿಗೆ ಪ್ರಶಸ್ತವಾಗಿರುತ್ತವೆ. ಅದೂ ಅಲ್ಲದೇ ಇವು ಒಂದು ರೀತಿಯ ನೀರಿನ ಮೇಲಿನ ಗುಳ್ಳೆಗಳಿದ್ದಂತೆ. ಅಲ್ಲಿ ಎಲ್ಲವೂ ಕ್ಷಣಿಕ. ಇವತ್ತು ಬರೆದದ್ದು ನಾಳೆಯಾಗುವಷ್ಟರಲ್ಲಿ ಎಲ್ಲೋ ಹೋಗಿಬಿಡುವ ಸಾಧ್ಯತೆಗಳು ಹೆಚ್ಚು ಮತ್ತು ಎಲ್ಲವನ್ನೂ ವ್ಯವಸ್ಥಿತವಾಗಿಟ್ಟುಕೊಳ್ಳಲು ಕಷ್ಟ. ಹಾಗಿದ್ದರೆ ಇದಕ್ಕೆ ಪರಿಹಾರ ಎಂದರೆ ಅಂತರಜಾಲದಲ್ಲಿ ಒಂದು ನಮ್ಮದೇ ಜಾಗವನ್ನಿಟ್ಟುಕೊಂಡು ಅದರಲ್ಲಿ ನಮ್ಮ ಬರವಣಿಗೆಗಳನ್ನು ಹಾಕುತ್ತಾ ಹೋಗುವುದು. ಇದಕ್ಕೆ ಅವಕಾಶ ಮಾಡಿಕೊಡುವ ತಾಣಗಳೇ ಬ್ಲಾಗ್ ಗಳು. 

ಬ್ಲಾಗ್ ಗಳು ಬಂದು ದಶಕದ ಮೇಲಾಗಿವೆ. ಅವು ಎಷ್ಟು ಜನಪ್ರಿಯವಾಗಿವೆ ಎಂದರೆ ಜಗತ್ತಿನಾದ್ಯಂತ ಲಕ್ಷಾಂತರ ಜನ ಬ್ಲಾಗ್ ಗಳಲ್ಲಿ ಬರೆಯುತ್ತಿದ್ದಾರೆ.  ಬ್ಲಾಗುಗಳಲ್ಲಿ ನಿಮ್ಮ ಬರಹಗಳನ್ನು ಹಾಕಿದರೆ ಆ ಬ್ಲಾಗಿನ ವಿಳಾಸದ ಕೊಂಡಿಯ ಮೂಲಕ ಯಾರು ಬೇಕಿದ್ದರೂ ಜಗತ್ತಿನ ಯಾವ ಮೂಲೆಯಲ್ಲಿ ಕುಳಿತೂ ಸಹ ಅದನ್ನು ನೋಡಬಹುದು. ಅದಕ್ಕೆ ಅನಿಸಿಕೆಗಳನ್ನು ಬರೆಯಬಹುದು. ನೀವು ನಿಮ್ಮ ಊರಿನಲ್ಲೇ ಕೂತು ಬರೆದ ಬರಹವನ್ನು ಬೇರೆ ಊರಿನ ನಿಮ್ಮ ಗೆಳೆಯರಿಗೆ ಓದಿಸಬಹುದು. ಇಂತದ್ದೇ ವಿಷಯ ಅಂತ ಏನಿಲ್ಲ. ನಿಮ್ಮ ಮನಸ್ಸಿಗೆ ಏನು ಬರೆಯಬೇಕಿನಿಸುತ್ತದೋ ಅವುಗಳನ್ನೆಲ್ಲಾ ಬರೆದು ಹಾಕಬಹುದು. ನಿಮ್ಮ ಬ್ಲಾಗಿನ ವಿಳಾಸ ಅಂತರಜಾಲದಲ್ಲಿ ಹಂಚಿಕೆಯಾಗುತ್ತಾ ಹೋಗಿ ನಿಮಗೆ ಗೊತ್ತಿಲ್ಲದೇ ಓದುಗ ಬಳಗವೂ ಸೃಷ್ಟಿಯಾಗಬಹುದು. ಇದು ಯಾರ ಹಂಗಿಲ್ಲದ ಬ್ಲಾಗರಮನೆ. ಇಲ್ಲಿ ನೀವೇ ಲೇಖಕರು, ನೀವೇ ಸಂಪಾದಕರು ಹಾಗೂ ನೀವೇ ಪ್ರಕಾಶಕರು. ಇತ್ತೀಚಿನ ವರ್ಷಗಳಲ್ಲಿ ಪತ್ರಿಕೆಗಳೂ ಸಹ ಬ್ಲಾಗುಗಳಲ್ಲಿ ಬರೆಯುವವರನ್ನು ಗುರುತಿಸುತ್ತಿವೆ. ಬ್ಲಾಗು ಬರಹಗಳನ್ನು ಪತ್ರಿಕೆಗಳಲ್ಲಿ ಪ್ರಕಟಿಸುತ್ತಿವೆ. ಬ್ಲಾಗುಗಳಲ್ಲಿ ಪ್ರಕಟವಾಗುವ ಬರಹಗಳಿಂದ ಅವರ ಬರವಣಿಗೆಯ ಪ್ರತಿಭೆಯನ್ನು ಗುರುತಿಸಿ ಅವರಿಂದ ಲೇಖನಗಳನ್ನೂ ಬರೆಸಿ ಪ್ರಕಟಿಸುತ್ತಿವೆ. ಬರವಣಿಗೆಯ ಅಭ್ಯಾಸವನ್ನು ಕಾಪಾಡಿಕೊಳ್ಳಲು, ನಿಮ್ಮ ಪ್ರತಿಭೆಗೆ ವೇದಿಕೆಯಾಗಿ, ಮಾಹಿತಿ, ಜ್ಞಾನದ ಹಂಚುವಿಕೆಗೆ ಮತ್ತು ಸಂವಹನಕ್ಕೆ ಇದೊಂದು ಒಳ್ಳೆಯ ಮಾಧ್ಯಮ. ಇದ್ಯಾವುದಕ್ಕೂ ಅಲ್ಲದೇ ಬ್ಲಾಗುಗಳನ್ನು ದಿನಚರಿ ಬರೆಯಲು ಬಳಸಬಹುದು ಮತ್ತು ಈ ರೀತಿಯಲ್ಲಿ ಒಂದು ವೈಯಕ್ತಿಕ ತಾಣವನ್ನಾಗಿಯೂ ನಿರ್ವಹಿಸಿಟ್ಟುಕೊಳ್ಳಬಹುದು.

ಬ್ಲಾಗ್ ಮಾಡೋದು ಹೇಗೆ? : ಬ್ಲಾಗ್ ಗಳಿಗೆ ಉಚಿತವಾಗಿ ಜಾಗವನ್ನು ಒದಗಿಸುವ ಹಲವಾರು ತಾಣಗಳಿವೆ. ಎಲ್ಲಾ ತಾಣಗಳಲ್ಲೂ ಬ್ಲಾಗುಗಳನ್ನು ರಚಿಸುವ ಬಗೆ ಬಹುತೇಕ ಒಂದೇ ರೀತಿ ಇರುತ್ತದೆ. ನಾವಿಲ್ಲಿ ಹೆಚ್ಚು ಪ್ರಚಲಿತದಲ್ಲಿರುವ ಎರಡು ತಾಣಗಳನ್ನು ಪರಿಚಯಿಸಿಕೊಳ್ಳೋಣ. ಮೊದಲನೆಯದು ಗೂಗಲ್ ನವರ ಬ್ಲಾಗರ್(www.blogger.com), ನೀವು ಅಂತರಜಾಲದಲ್ಲಿ ಬ್ಲಾಗರ್ ತಾಣವನ್ನು ತೆರೆದರೆ ಅದು ಲಾಗಿನ್ ಕೇಳುತ್ತದೆ. ನೀವು ಈಗಾಗಲೇ ಜಿ-ಮೇಲ್ ಬಳಕೆದಾರರಾಗಿದ್ದರೆ ಅದೇ ಯೂಸರ್ ನೇಮ್ ಮತ್ತು ಪಾಸ್ವರ್ಡ್ ಮೂಲಕ ಲಾಗಿನ್ ಆಗಬಹುದು.  ಜಿಮೇಲ್ ಬಳಕೆದಾರರಿಗೆ ಬ್ಲಾಗರ್ ತಾಣವನ್ನು ಕೂಡ ಒದಗಿಸಿಕೊಟ್ಟಿರುತ್ತಾರೆ. ಒಂದು ವೇಳೆ ನೀವು ಜಿಮೇಲ್ ಬಳಕೆದಾರರಲ್ಲದಿದ್ದರೆ ಹೊಸ ಗೂಗಲ್ ಖಾತೆಯೊಂದನ್ನು ಸೃಷ್ಟಿಸಿಕೊಳ್ಳಬೇಕಾಗುತ್ತದೆ. ಎರಡನೆಯದು ವರ್ಡ್ ಪ್ರೆಸ್ (www.wordpress.com). ಈ ತಾಣದಲ್ಲಿಯೂ ಕೂಡ ಬ್ಲಾಗ್ ರಚಿಸಿಕೊಳ್ಳಬೇಕಾದರೆ ಮೊದಲಿಗೆ ನೋಂದಾಯಿಸಿಕೊಂಡು ಲಾಗಿನ್ ಮಾಡಿಕೊಳ್ಳಬೇಕಾಗುತ್ತದೆ. ಇದು ಇ-ಮೇಲ್ ಖಾತೆಯನ್ನು ರಚಿಸಿಕೊಂಡಷ್ಟೇ ಸುಲಭ. ಒಮ್ಮೆ ಇದರಲ್ಲಿ ನಿಮ್ಮ ಖಾತೆಯನ್ನು ರಚಿಸಿಕೊಂಡು ಒಳಪ್ರವೇಶಿಸಿದ ಅನಂತರ ಅಲ್ಲಿರುವ ಸೂಚನೆಗಳಂತೆ ಮುಂದುವರೆದು ನೀವು ನಿಮ್ಮ ಬ್ಲಾಗ್ ತಾಣವನ್ನು ರೂಪಿಸಿಕೊಳ್ಳಬಹುದು.  ನಿಮ್ಮ ಬ್ಲಾಗ್ ತಾಣದ ಹೆಸರು ಏನಿರಬೇಕು, ಅದರ ವಿಳಾಸದ ಕೊಂಡಿ ಏನಿರಬೇಕು ಎಂಬುದನ್ನು ನೀವು ನಮೂದಿಸಬಹುದು. ಬ್ಲಾಗಿನಲ್ಲಿ ಯಾವ ಮಾದರಿಯ ಟೆಂಪ್ಲೇಟ್ ಬಳಸಬಹುದು, ಯಾವ ಹಿನ್ನೆಲೆ ಬಣ್ಣಗಳು ಬೇಕು ಎಂಬಂತಹ ಹಲವಾರು ಆಯ್ಕೆಗಳು ಲಭ್ಯವಿರುತ್ತವೆ. ಇವೆಲ್ಲಾ ಆಯ್ಕೆಗಳ ಮೂಲಕ ನಿಮ್ಮಿಷ್ಟದಂತೆ ಬ್ಲಾಗ್ ಮಾಡಿಕೊಳ್ಳಬಹುದು.

ನೀವೂ ಬರೆಯಿರಿ…

ಈಗ ನಿಮ್ಮ ಬರಹಗಳನ್ನು ಹಾಕಲು ನಿಮ್ಮದೇ ಒಂದು ತಾಣವನ್ನು ಮಾಡಿಕೊಂಡದ್ದಾಯಿತು. ಅದರಲ್ಲಿ ಬರಹವೊಂದನ್ನು ಹಾಕಲು ಹೊಸ ಪೋಸ್ಟ್ ಆಯ್ಕೆಯನ್ನು ಕೊಟ್ಟರೆ ನಿಮಗೆ ಅಕ್ಷರಗಳನ್ನು ಟೈಪ್ ಮಾಡಲು ಅವಕಾಶ ಮಾಡಿಕೊಡುವಂತಹ ವಿಂಡೋ ಒಂದು ತೆರೆದುಕೊಳ್ಳುತ್ತದೆ. ಅದರಲ್ಲಿ ನೀವು ನಿಮಗೆ ಬರೆಯಬೇಕೆನಿಸಿದ್ದನ್ನು ನೇರವಾಗಿ ಟೈಪ್ ಮಾಡಬಹುದು ಅಥವಾ ಈಗಾಗಲೇ ಬೇರೆಡೆ ಟೈಪ್ ಮಾಡಿಟ್ಟುಕೊಂಡಿದ್ದರೆ ಅದನ್ನು ಇಲ್ಲಿಗೆ ಕಾಪಿ ಪೇಸ್ಟ್ ಮಾಡಬಹುದು. ಬರೇ ಅಕ್ಷರಗಳಲ್ಲದೇ ಚಿತ್ರಗಳನ್ನು ಹಾಕಲು, ಆಡಿಯೋ ವೀಡಿಯೋ ಫೈಲುಗಳನ್ನು ಹಾಕಲು, ಅಕ್ಷರಶೈಲಿಗಳನ್ನು, ಬಣ್ಣಗಳನ್ನು, ಗಾತ್ರವನ್ನು ಬದಲಾಯಿಸಲು ಮತ್ತು ಇನ್ನೂ ಹಲಬಗೆಯ ಸೌಲಭ್ಯಗಳೂ ಅಲ್ಲೇ ಇರುತ್ತವೆ. ನಿಮಗೆ ಬೇಕಾದಂತೆ ಎಲ್ಲವನ್ನೂ ತಯಾರು ಮಾಡಿಕೊಂಡ ನಂತರ ಅದನ್ನು ಪ್ರಕಟಿಸಬಹುದು. ಒಮ್ಮೆ ಅದು ಪ್ರಕಟಗೊಂಡು ಅಂತರಜಾಲಕ್ಕೆ ಸೇರಿದ ಮೇಲೆ ಬ್ಲಾಗಿನ ವಿಳಾಸದ ಕೊಂಡಿಯ ಮೂಲಕ ಅದು ಜಗತ್ತಿನಲ್ಲಿ ಎಲ್ಲಿಂದ ಬೇಕಾದರೂ ಕೂಡ ತೆರೆದುನೋಡಬಹುದಾಗಿರುತ್ತದೆ.  ಮತ್ತೊಂದು ಬರಹವನ್ನು ಹಾಕುವಾಗಲೂ ಇದೇ ರೀತಿ ಹೊಸ ಪೋಸ್ಟ್ ತಯಾರು ಮಾಡಿಕೊಂಡು ಪ್ರಕಟ ಮಾಡಬೇಕಾಗುತ್ತದೆ. ನಿಮಗೆ ಬರೆಯಬೇಕೆನಿಸಿದಾಗಲೆಲ್ಲಾ ಹೊಸ ಹೊಸ ಬರಹಗಳನ್ನು ಪ್ರಕಟಿಸುತ್ತಿರಬಹುದು.  ಬ್ಲಾಗುಗಳ ಭಾಷೆಗೆ ಮತ್ತು ವಿಷಯಗಳಿಗೆ ಯಾವುದೇ ನಿರ್ಬಂಧ ಇಲ್ಲ. ನಮಗೆ ಬೇಕಾದ ಭಾಷೆಯಲ್ಲಿ ನಮಗೆ ಬರೆಯಬೇಕಿನಿಸಿದ ವಿಷಯವನ್ನು ಬರೆಯಬಹುದು. ನಿಮ್ಮ ಅಭಿವ್ಯಕ್ತಿಯ ಭಾಷೆ ಯಾವುದು ಮತ್ತು ನಿಮ್ಮ ಓದುಗರ ವ್ಯಾಪ್ತಿ ಎಲ್ಲಿವರೆಗಿದೆ ಎಂಬುದರ ಆಧಾರದ ಮೇಲೆ ಇದನ್ನು ತೀರ್ಮಾನಿಸಿಕೊಳ್ಳಬಹುದು. ನಮ್ಮ ಕನ್ನಡದಲ್ಲೇ ಪ್ರಕಟಗೊಳ್ಳುವ ಸಾವಿರಾರು ಬ್ಲಾಗ್ ಗಳಿವೆ.. ವಿವಿಧ ವಿಷಯಗಳನ್ನು ಬರೆಯುವ ಬ್ಲಾಗುಗಳ ಜೊತೆಗೆ ಅಡುಗೆ, ಹಾಸ್ಯ, ವಿಜ್ಞಾನ, ಕತೆಕವನ, ರಾಜಕೀಯ ವಿಶ್ಲೇಷಣೆ ಇತ್ಯಾದಿ ನಿರ್ದಿಷ್ಟ ವಿಷಯಗಳನ್ನೇ ಬರೆಯುವ ಬ್ಲಾಗುಗಳಿವೆ. ಫೋಟೋಗ್ರಫಿ ಬ್ಲಾಗುಗಳು, ಆಡಿಯೋ, ವಿಡಿಯೋ ಬ್ಲಾಗುಗಳೂ ಇವೆ.  ಉದಾಹರಣೆಗೆ ಪ್ರವಾಸಕ್ಕೆ ಮೀಸಲಾಗಿರುವ ‘ಅಲೆಮಾರಿಯ ಅನುಭವಗಳು’ ಬ್ಲಾಗ್ (http://rajesh-naik.blogspot.com/), ಅಡುಗೆಗಳಿಗೆ ಮೀಸಲಾಗಿರುವ ‘ಅಡುಗೆ-ಸವಿರುಚಿ’ ಬ್ಲಾಗ್ (http://indiankannadarecipes.blogspot.com), ಸಿನೆಮಾ ವಿಷಯಕ್ಕೆ ಮೀಸಲಾಗಿರುವ ‘ಸಾಂಗತ್ಯ’ ಬ್ಲಾಗ್ (http://saangatya.wordpress.com). ಕನ್ನಡದಲ್ಲಿ ಬರೆಯಲು ಹತ್ತುಹಲವಾರು ತಂತ್ರಾಂಶಗಳಿವೆ. ಅವುಗಳ ಪಟ್ಟಿಯನ್ನು ಇಲ್ಲಿ ನೋಡಬಹುದು: KannadaTyping. 

ಇಷ್ಟೆಲ್ಲಾ ಸೌಲಭ್ಯಗಳಿದ್ದಾಗ ತಡವೇಕೆ? ನಿಮ್ಮದೇ ಒಂದು ಬ್ಲಾಗ್ ಮಾಡಿಕೊಳ್ಳಿ. ಬರವಣಿಗೆ ಶುರುಮಾಡಿ. ಆದರೆ ಎಚ್ಚರ ಇರಲಿ. ಯಾವುದೇ ವ್ಯಕ್ತಿಯನ್ನು ಹಳಿಯಲು, ತೇಜೋವಧೆ ಮಾಡಲು ಬ್ಲಾಗುಗಳನ್ನು ಬಳಸಬೇಡಿ. ಅಶ್ಲೀಲ, ಅಸಭ್ಯ ವಿಷಯ, ಚಿತ್ರಗಳನ್ನು ಹಾಕದಿರಿ ಮತ್ತು ಯಾವುದೇ ದುರುದ್ದೇಶಕ್ಕಾಗಿ ಬ್ಲಾಗ್ ಬಳಕೆಯಾಗದಿರಲಿ. ಬ್ಲಾಗುಗಳನ್ನು ನಿಮ್ಮ ವ್ಯಕ್ತಿತ್ವದ ಅರಳುವಿಕೆಯ ಭಾಗವಾಗಿಟ್ಟುಕೊಳ್ಳಿ.

********
ಹೆಚ್ಚಿನ ಮಾಹಿತಿ: ಬ್ಲಾಗಿಂಗ್ - ಪರ್ಯಾಯ ಪತ್ರಿಕೋದ್ಯಮ, ಡಾ. ಯು. ಬಿ. ಪವನಜ, ಇಜ್ಞಾನ ಡಾಟ್ ಕಾಮ್‌ 

Kannada books online purchase

ಕನ್ನಡ ಪುಸ್ತಕಗಳ ಆನ್ ಲೈನ್ ಖರೀದಿ

ಕನ್ನಡ ಪುಸ್ತಕಗಳನ್ನು ಕೊಳ್ಳಲು ಬೆಂಗಳೂರು, ಮೈಸೂರು ಹೊರತುಪಡಿಸಿ ಬೇರೆ ಊರುಗಳಲ್ಲಿ ಒಳ್ಳೆಯ ಸಂಗ್ರಹವಿರುವ ಅಂಗಡಿಗಳಿಲ್ಲ (ಅಥವಾ ಕೊಳ್ಳುವವರಿಲ್ಲ?!). ಬೆಂಗಳೂರಿನಲ್ಲಾದರೂ ಪುಸ್ತಕದಂಗಡಿಗೆ ಹೋಗಬೇಕೆಂದರೆ ಒಂದು ಕಡೆಯಿಂದ ಮತ್ತೊಂದು ಕಡೆಗೆ ಓಡಾಟವೇ ಬಹಳ ಸಮಯ ತೆಗೆದುಕೊಳ್ಳುತ್ತದೆ ಮತ್ತು ಓಡಾಟದ ಶ್ರಮದ, ಹಣದ ಖರ್ಚೂ ಆಗುತ್ತದೆ. ಹಾಗಾಗಿ ಇತ್ತೀಚಿನ ದಿನಗಳಲ್ಲಿ ಇಂಟರ್ನೆಟ್ ಮೂಲಕ ಪುಸ್ತಕ ಕೊಂಡು ಮನೆಗೇ ತರಿಸಿಕೊಳ್ಳುವ ವ್ಯವಸ್ಥೆ ಬಂದಿರುವುದರಿಂದ ಯಾವ ಊರಲ್ಲಿದ್ದರೂ ಅದನ್ನು ಬಳಸಿಕೊಳ್ಳಬಹುದು.

ಈ ಕೆಳಗಿನದು ಕನ್ನಡ ಪುಸ್ತಕಗಳನ್ನು ಆನ್ ಲೈನ್ ಕೊಳ್ಳಲು ಇರುವ ತಾಣಗಳ ಪಟ್ಟಿ.  ಇವುಗಳಲ್ಲದೇ ಇನ್ನೂ ಬೇರೆ ತಾಣಗಳು ಗೊತ್ತಿದ್ದರೆ ತಿಳಿಸಿ.

• ಫ್ಲಿಪ್ ಕಾರ್ಟ್ 
• ಸಪ್ನಾ ಬುಕ್ ಹೌಸ್  
• ಟೋಟಲ್ ಕನ್ನಡ  
• ಅಮೇಜಾನ್.ಇನ್
• ಸ್ನ್ಯಾಪ್ ಡೀಲ್
• ರಾಮಕೃಷ್ಣ ಮಠ 
• ಅಕ್ಷರ ಪ್ರಕಾಶನ, ಹೆಗ್ಗೋಡು
• ನವಕರ್ನಾಟಕ
• ಕನ್ನಡ ಸ್ಟೋರ್  (ಇದು ಡಾಲರ್ ನವರಿಗೆ ಮಾತ್ರ)
• ಅಮೇಜಾನ್.ಕಾಮ್ 
• ಬುಕ್ಸ್ ಫಾರ್ ಯು (ಕಡಿಮೆ ಸಂಗ್ರಹ)
• ಬುಕ್ ಸ್ಟಾಕ್  (ಕಡಿಮೆ ಸಂಗ್ರಹ)
• ಐಬಿಎಚ್ ಪ್ರಕಾಶನ
• ಅಮೇಜಾನ್ ಕನ್ನಡ ಸ್ಟೋರ್
• ಮೈ ಬುಕ್ ಅಡ್ಡಾ - ಸ್ನೇಹಾ ಬುಕ್ ಹೌಸ್
• SumShowDone
• ಚಿಂತನ ಪುಸ್ತಕ 
• ಮನೋಹರ ಗ್ರಂಥಮಾಲೆ
• ಬುಕ್ಸ್ ಬೇಕಾ 
• ಹರಿವು ಬುಕ್ಸ್
• ಕುವೆಂಪು ಭಾಷಾಭಾರತಿ ಪ್ರಾಧಿಕಾರ
• ಕನ್ನಡಲೋಕ
• ಋತುಮಾನ ಅಂಗಡಿ
• ಪ್ರಜೋದಯ ಪ್ರಕಾಶನ
• ರಾಷ್ಟ್ರೋತ್ಥಾನ ಸಾಹಿತ್ಯ
• ಕನ್ನಡ ಪುಸ್ತಕ ಪ್ರಾಧಿಕಾರ 
• ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರ
• ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರ (Android App)
• ವಿವಿಡ್ ಲಿಪಿ
• ಇಜ್ಞಾನ ಬುಕ್ ವರ್ಲ್ಡ್
• ಚೇತನಾ ಬುಕ್ ಹೌಸ್
• ಬಹುರೂಪಿ ಬುಕ್ಸ್
• ಗೋಮಿನಿ ಪ್ರಕಾಶನ
• ಕನ್ನಡ ಪುಸ್ತಕಗಳು.ಕಾಂ
• ವಾಸನ್ ಪಬ್ಲಿಕೇಶನ್ 
• ಸಾಹಿತ್ಯ ಪ್ರಕಾಶನ, ಹುಬ್ಬಳ್ಳಿ
• ಅಭಿನವ 
• ಅಮೂಲ್ಯ ಪುಸ್ತಕ
• ಪುಸ್ತಕ ಮಾರಾಟ ಜಾಲ (Android App)
• ಕನ್ನಡಲೋಕ
• ಅಂಕಿತ ಪುಸ್ತಕ, ಬಸವನಗುಡಿ, ಬೆಂಗಳೂರು
• ಬುಕ್ಸ್ ಲೋಕ
• ಸಾಹಿತ್ಯಲೋಕ ಪಬ್ಲಿಕೇಶನ್ಸ್
• ವೀರಲೋಕ ಬುಕ್ಸ್
• ಪ್ರಿಸಂ ಬುಕ್ಸ್
• ಕನ್ನಡಪುಸ್ತಕ.ನೆಟ್
• ಅಯೋಧ್ಯಾ ಬುಕ್ಸ್
• ಪುಸ್ತಕ ಸಂಪದ

ಕೆಲವು ತಾಣಗಳಲ್ಲಿ ಕಡಿಮೆ ಪುಸ್ತಕಗಳ ಸಂಗ್ರಹವಿದೆ. ಆಕೃತಿ ಬುಕ್ಸ್, ಅಕ್ಷರ ಪ್ರಕಾಶನ, ಮೈ ಬುಕ್ ಅಡ್ಡಾ, ಚಿಂತನ ಪುಸ್ತಕ, ನವಕರ್ನಾಟಕ, ಕ್ವಿಲ್ ಬುಕ್ಸ್ ಮುಂತಾದ ಕೆಲವು ತಾಣಗಳಲ್ಲಿ ಕನ್ನಡ ಪುಸ್ತಕಗಳ ಹೆಸರನ್ನು ಕನ್ನಡದಲ್ಲೇ ಟೈಪಿಸಿ ಹುಡುಕಬಹುದು ಅನ್ನುವುದು ವಿಶೇಷ. ಆದರೆ ಬೇರೆ  ತಾಣಗಳಲ್ಲಿ ಕನ್ನಡ ಹೆಸರನ್ನು ಇಂಗ್ಲೀಷ್ ಲಿಪಿಯಲ್ಲಿ ಹುಡುಕಬೇಕು. ಈ ಎಲ್ಲಾ ತಾಣಗಳಲ್ಲಿ ನಮಗೆ ಬೇಕಾದ ಎಲ್ಲಾ ಪುಸ್ತಕಗಳು ಇದ್ದೇ ಇರುತ್ತವೆ ಅಂತ ಹೇಳಲಾಗುವುದಿಲ್ಲ. ಆದರೂ ಒಂದು ಮಟ್ಟಿಗೆ ಒಳ್ಳೆಯ ಸಂಗ್ರಹವಿದೆ.  ಪುಸ್ತಕಗಳು ರಿಯಾಯತಿ ದರಗಳಲ್ಲಿಯೂ ಮಾರಾಟಕ್ಕಿರುತ್ತವೆ.

ನೀವು ಹುಡುಕುವ ಯಾವುದಾದರೂ ಪುಸ್ತಕ ಸಿಗಲಿಲ್ಲವೆಂದರೆ ಆ ತಾಣದ ಗ್ರಾಹಕ ಸೇವೆಗೆ ಒಂದು ಇ-ಮೇಲ್ ಕಳಿಸಿ ಹೆಚ್ಚು ಕನ್ನಡ ಪುಸ್ತಕಗಳನ್ನು ಸೇರಿಸಲು ಹೇಳಿ.  ಆಗ ಅವರು ಪುಸ್ತಕಗಳಿಗೆ ಬೇಡಿಕೆ ಇದೆ ಎಂದು ಖಂಡಿತ ಹೆಚ್ಚಿನ ಪುಸ್ತಕಗಳನ್ನು ಸಂಗ್ರಹಕ್ಕೆ ಸೇರಿಸುತ್ತಾರೆ. ಮುಂದೆ ಅನುಕೂಲವಾಗುತ್ತದೆ.

ನನ್ನ ವೈಯಕ್ತಿಕ ಅನುಭವ ಹೇಳುವುದಾದರೆ,  ಇವುಗಳಲ್ಲಿ ಆಕೃತಿ ಬುಕ್ಸ್, ಫ್ಲಿಪ್ ಕಾರ್ಟ್, ಸಪ್ನಾ, ನವಕರ್ನಾಟಕ ,ಇನ್ಫಿಬೀಮ್ ಗಳಿಂದ ಹಲವು ಪುಸ್ತಕಗಳನ್ನು ತರಿಸಿಕೊಂಡಿದ್ದೇನೆ. ಒಳ್ಳೆಯ ಸೇವೆ ಕೊಟ್ಟಿದ್ದಾರೆ.  ಅಮೇಜಾನ್.ಕಾಂನಲ್ಲಿ ಇಂಗ್ಲೀಶ್ ಪುಸ್ತಕಗಳನ್ನು ತರಿಸಿದ್ದೇನೆ. ಆದರೆ ಅದರ ಭಾರತೀಯ ಆವೃತ್ತಿಯಲ್ಲಿ (ಅಮೇಜಾನ್.ಇನ್) ವ್ಯವಹಾರ ಮಾಡಿಲ್ಲ. ಜಯನಗರದಲ್ಲಿರುವ ಟೋಟಲ್ ಕನ್ನಡ ಮಳಿಗೆಯೂ ಕೂಡ ಒಳ್ಳೆಯ ಸೇವೆ ಕೊಡುತ್ತಿದೆ. ಉಳಿದಂತೆ ಪಟ್ಟಿಯಲ್ಲಿರುವ ಇತರ ತಾಣಗಳ ಜೊತೆ ವ್ಯವಹರಿಸಿಲ್ಲವಾದರೂ ಹೆಚ್ಚಾಗಿ ಕ್ಯಾಶ್ ಆನ್ ಡೆಲಿವರಿ  ಆಯ್ಕೆ ಇರುತ್ತದಾದ್ದರಿಂದ ಏನೂ ತೊಂದರೆಯಿಲ್ಲ. 

ಓದಿ... ಓದಿಸಿ...

(ಸೂಚನೆ: ಮೇಲಿನ ಪಟ್ಟಿಯಲ್ಲಿರುವ  ಕೆಲವು ತಾಣಗಳು ಈಗ ಸೇವೆಯನ್ನು ನಿಲ್ಲಿಸಿರಬಹುದು)

(೨೦೧೯-೨೦ update: ಈಗ ಆನ್ ಲೈನ್ ಖರೀದಿ ಜನಪ್ರಿಯವಾಗಿದ್ದು ಎಲ್ಲರೂ ಚೆನ್ನಾಗಿ ಸೇವೆ ಕೊಡುತ್ತಿದ್ದಾರೆ.)

ಗೊಂದಲದ ಮೀನು

ಕೆರೆಯ ದಡದ ಕಲ್ಲು ಬೆಂಚಿನ ಮೇಲೆ ಕುಳಿತಿದ್ದೆ. ಎದುರಿನ ದಿಗಂತದವರೆಗೂ ನೀರು. ಗಾಳಿಗೆ ಏಳುವ ಸಣ್ಣ ಸಣ್ಣ ಅಲೆಗಳು. ಎಷ್ಟು ಹೊತ್ತು ನೋಡಿದರೂ  ಖುಷಿ ಕೊಡುವಂತಹ, ಮತ್ತದೇ ಅಚ್ಚರಿ ಹುಟ್ಟಿಸುವಂತಹ ಪ್ರಕೃತಿ. ಅದನ್ನು ನೋಡುತ್ತಾ ಸುಮ್ಮನೇ ಕೂರುವ ಸುಖಕ್ಕೆ ಒಂದಿಷ್ಟು ಹಾರುವ ಹುಳಗಳು ಅಡ್ಡಿಯಾಗುತ್ತಿದ್ದವು. ಕೆಲವು ತಲೆಯ ಸುತ್ತ ಹಾರುತ್ತಿದ್ದರೆ ಕೆಲವು ಕಿವಿಯ ಹತ್ತಿರ ಬಂದು ಗುಯ್ಯ್ ಗುಡುತ್ತಿದ್ದವು. ತಲೆಕೊಡವಿ ಅವುಗಳನ್ನು ಓಡಿಸಿ ಮತ್ತೆ ದಿಗಂತಕ್ಕೆ ಕಣ್ಣು ಹಾಯಿಸಿದರೆ ಒಂದೇ ನಿಮಿಷದಲ್ಲಿ ಮತ್ತೆ ಪ್ರತ್ಯಕ್ಷ. ಅದೇ ಹಾರಾಟ. ಅದೇ ಗುಂಯ್ಯ್ ಸದ್ದು. ಬೇಸರವಾಗಿ ಅವುಗಳನ್ನು ಓಡಿಸದೇ ಹಾಗೇ ಬಿಟ್ಟೆ. ಬಂದು ಹಾರಾಡಲಿ, ಸದ್ದು ಮಾಡಲಿ, ಮುತ್ತಿಕೊಳ್ಳಲಿ, ಕೊರೆಯಲಿ. ಕೊನೆಗೆ ಇಲ್ಲಿದ್ದು ಪ್ರಯೋಜನವಿಲ್ಲ ಎಂದು ಗೊತ್ತಾದರೆ ಅವೇ ಹೋಗಿಬಿಡುತ್ತವೆ ಎಂದುಕೊಂಡು ಸುಮ್ಮನಾದೆ. 

ಇದ್ದಕ್ಕಿದ್ದಂತೇ ಹಕ್ಕಿಗಳ ಕೂಗು ಕೇಳಿಸಿತು. ಎರಡು ಹಕ್ಕಿಗಳು ಒಂದನ್ನೊಂದು ಅಟ್ಟಿಸಿಕೊಂಡು ಕೂಗಾಡುತ್ತಾ ನಾನು ಕುಳಿತಿದ್ದ ಜಾಗದಿಂದ ಸ್ವಲ್ಪ ದೂರದಲ್ಲಿ ಇಳಿದವು. ಒಂದು ಹಕ್ಕಿಯ ಕೊಕ್ಕಲ್ಲಿ ಮೀನೊಂದು ಒದ್ದಾಡುತ್ತಿತ್ತು.  ಅದೇನಾಯಿತೋ ಏನೋ ಆ ಹಕ್ಕಿ ತನ್ನ ಕೊಕ್ಕಲ್ಲಿದ್ದ ಮೀನನ್ನು ನೆಲದ ಮೇಲೆ ಹಾಕಿತು.  ಒಂದು ಕ್ಷಣವೂ ನಿಲ್ಲದೇ ಎರಡೂ ಹಕ್ಕಿಗಳೂ ಎಲ್ಲೋ ಹಾರಿ ಹೋದವು. ನಾನು ನೋಡುತ್ತಿದ್ದೆ. ಆ ಮೀನಿಗೆ ಇನ್ನೂ ಜೀವ ಇತ್ತು. ಒದ್ದಾಡುತ್ತಿತ್ತು. ಎಂಟು ಹತ್ತು ಅಡಿಗಳ ದೂರದಲ್ಲಿ ನೀರಿತ್ತು. ಅದರ ಸಾವಿಗೂ ಬದುಕಿಗೂ ಅಷ್ಟೇ ಅಂತರ. ಆದರೂ ಅದು ತನ್ನನ್ನು ಕಾಪಾಡಿಕೊಳ್ಳಲಾರದು. ಅದನ್ನು ತೆಗೆದು ನೀರಿಗೆ ಹಾಕಿಬಿಡಲೇ ಯೋಚಿಸಿದೆ. ಆದರೆ ಅದು ನೈಸರ್ಗಿಕ ಕ್ರಿಯೆಯ ಭಾಗ. ಆ ಹಕ್ಕಿ ಅದನ್ನು ಬೇಟೆ ಆಡಿ ಹಿಡಿದಿದೆ. ಅದು ಅದರ ಆಹಾರ. ಅದನ್ನು ಮುಟ್ಟುವ ಹಕ್ಕಿಲ್ಲ ಅನ್ನಿಸಿತು. ಸುಮ್ಮನೇ ಕುಳಿತೆ. ಆ ಹಕ್ಕಿ ಮತ್ತೆ ಬರಬಹುದು. ತನ್ನ ಆಹಾರ ಎಲ್ಲಿ ಹೋಯಿತು ಎಂದು ಹುಡುಕಬಹುದು. ಯಾವ ಕಾರಣಕ್ಕೆ ಅದನ್ನು ಇಲ್ಲಿ ಹಾಕಿ ಹೋಗಿತ್ತೋ ಏನೋ! ಹಾಗಿದ್ದರೆ ಕಣ್ಣ ಮುಂದೆ ಜೀವಿಯೊಂದನ್ನು ಬದುಕಿಸುವ ಅವಕಾಶವಿದ್ದೂ ಸುಮ್ಮನಿರುವುದು ಯಾವ ಮನುಷ್ಯತ್ವ? ಅದು ಇನ್ನೂ ಒದ್ದಾಡುತ್ತಿತ್ತು. ನೋಡುತ್ತಾ ಸುಮ್ಮನೇ ಕೂರಲೂ ಮನಸು ಒಪ್ಪಲಿಲ್ಲ. ಇಡೀ ಕೆರೆದಂಡೆಯಲ್ಲಿ ಯಾರೂ ಇರಲಿಲ್ಲ. ಈ ಘಟನೆಯನ್ನು ನೋಡಿದವನು ನಾನೊಬ್ಬನೆ, ಈಗ ಅದನ್ನು ಬದುಕಿಸಬಲ್ಲವನೂ ನಾನೊಬ್ಬನೆ ! ಹಾಗೇ ಆಕಾಶಕ್ಕೆ ನೋಡಿದೆ, ಆ ಹಕ್ಕಿಗಳು ಮತ್ತೆ ಬರಬಹುದೇ . ಎಲ್ಲೂ ಕಾಣಲಿಲ್ಲ. ಮೀನಿನ ಒದ್ದಾಟ ಕ್ಷೀಣವಾಗುತ್ತಿತ್ತು. ಏನಾದರಾಗಲಿ ಅದನ್ನು ನೀರಿಗೆ ಹಾಕೋಣ ಎಂದು ಅದರ ಹತ್ತಿರ ಹೋದೆ. ನೋಡಿದರೆ ಆ ಮೀನು ವಿಚಿತ್ರವಾಗಿತ್ತು. ಕರೀ ಬಣ್ಣದ್ದಿತ್ತು. ಅದರ ಮೈತುಂಬಾ ಸಣ್ಣ ಸಣ್ಣ ಕೂದಲುಗಳಿರುವಂತೆ ಕಾಣುತ್ತಿತ್ತು. ಇದುವರೆಗೂ ಅಂತಹ ಮೀನನ್ನು ನೋಡಿರಲಿಲ್ಲ. ಅದು ಯಾವ ರೀತಿಯ ಮೀನೋ ಏನೋ. ಅದನ್ನು ಮುಟ್ಟಿ ನನಗೇನಾದರೂ ತೊಂದರೆಯಾದರೆ? ಮತ್ತೆ ಹಿಂಜರಿದೆ. ಎದುರಿಗೇ ಒಂದು ಜೀವಿಯ ಸಾವನ್ನು ನೋಡುತ್ತಾ ಸುಮ್ಮನಿದ್ದಂತಾಗುತ್ತದಲ್ಲ. ಅದನ್ನು ಮುಟ್ಟದೇ ಹಾಗೇ ನೀರಿಗೆ ಹಾಕಲು ಸಾಧ್ಯವೇ ಯೋಚಿಸಿದೆ. ಅದು ಉಸಿರಿಗಾಗಿ ನಿಧಾನಕ್ಕೆ ದೇಕುತ್ತಿತ್ತು.

ಅಷ್ಟರಲ್ಲೇ ಹಿಂದೆ ಸ್ವಲ್ಪ ದೂರದಲ್ಲಿ ಮಕ್ಕಳ ಧ್ವನಿ ಕೇಳಿಸಿತು. ಇಬ್ಬರು ಹುಡುಗರು ಸ್ಕೇಟಿಂಗ್ ಆಡುತ್ತಾ ಕೆರೆದಂಡೆಯಲ್ಲಿ ಬರುತ್ತಿದ್ದರು. ನೋಡ ನೋಡುತ್ತಿದ್ದಂತೇ ಜುಯ್ಯನೇ ನನ್ನ ಬಳಿಯೇ ಬಂದರು. ಅದರಲ್ಲೊಬ್ಬನ ಕಣ್ಣಿಗೆ ಈ ಮೀನು ಕಾಣಿಸಿಯೇಬಿಡ್ತು. ಅವನು “ಹೇಯ್ ಇಲ್ನೋಡು ಮೀನು” ಅಂದ. ಮತ್ತೊಬ್ಬ “ಇನ್ನೂ ಜೀವ ಇದೆ ಅದಕ್ಕೆ, ನೀರಿಗೆ ಹಾಕೋಣ” ಅಂದ. ಅವನು ಮಾತು ಮುಗಿಸುವುದರೊಳಗಾಗಿಯೇ ಆ ಮೀನನ್ನು ಮೊದಲು ನೋಡಿದ್ದ ಹುಡುಗ ಅದನ್ನು ಹಿಡಿದು ಎತ್ತಿ ನೀರಿಗೆ ಎಸೆದ. ಮತ್ತೆ ಏನೋ ಕೂಗಾಡಿಕೊಳ್ಳುತ್ತಾ ಅವರಿಬ್ಬರೂ ಸ್ಕೇಟಿಂಗ್ ಮಾಡಿಕೊಂಡು ಹೋಗಿಯೇಬಿಟ್ಟರು. ಇಷ್ಟೊತ್ತು ಒದ್ದಾಡುತ್ತಾ ಬಿದ್ದಿದ್ದ ಮೀನು ಕೆಲವೇ ಸೆಕೆಂಡುಗಳಲ್ಲಿ ನೀರು ಸೇರಿತ್ತು.  

ಅರೇ! ಇಷ್ಟು ಸುಲಭದ ಕೆಲಸ ನಾನ್ಯಾಕೆ ಮಾಡಲಾಗಲಿಲ್ಲ? ಅದೇಕೆ ನಿಸರ್ಗ ನಿಯಮ ಅಂತೆಲ್ಲಾ ಯೋಚಿಸಿದೆ? ನನಗೇನಾದರೂ ಅಪಾಯ ಆಗಬಹುದು ಅಂತ ಹಿಂಜರಿದೆ? ಅಲ್ಲಿಂದ ಹೋಗಿ ಕಲ್ಲು ಬೆಂಚಿನ ಮೇಲೆ ಕುಳಿತೆ. ಎದುರಿಗೆ ಅದೇ ಸುಂದರ ಪ್ರಶಾಂತ ಜಲರಾಶಿ. ಇಷ್ಟು ಹೊತ್ತು ಎಲ್ಲಿದ್ದವೋ ಏನೋ ಮತ್ತೆ ಆ ಹುಳಗಳು ಬಂದು ತಲೆ ಸುತ್ತ ಹಾರುತ್ತಾ ಗುಂಯ್ಯ್ ಗುಡತೊಡಗಿದವು.

*********

ಗೂಗಲ್ ರೀಡರ್ ನಿವೃತ್ತಿ, ಮುಂದೇನು ಗತಿ !

ಮಾರ್ಚ್ ೧೩ ರಂದು ಎಂದಿನಂತೆ ಗೂಗಲ್ ರೀಡರ್ ತೆರೆದಾಗ ಸಂದೇಶವೊಂದು ಕಾಣುತ್ತಿತ್ತು.  ಅದರಲ್ಲಿ ಜುಲೈ ೧, ೨೦೧೩ಕ್ಕೆ ಗೂಗಲ್ ರೀಡರ್ ನಿವೃತ್ತಿ ಅಗುವುದಾಗಿ ಹೇಳಿತ್ತು. ರೀಡರ್ ಬಳಕೆದಾರರು ಮತ್ತು ಅಭಿಮಾನಿಗಳಿಗೆ ಇದು ಬ್ರೇಕಿಂಗ್ ಮತ್ತು ಶಾಕಿಂಗ್ ನ್ಯೂಸ್ ಆಗಿತ್ತು.

ಈ ಮೊದಲು ಗೂಗಲ್ ಬಜ್, ವೇವ್ ಮುಂತಾದ ಸೇವೆಗಳನ್ನು ನಿಲ್ಲಿಸಿದ್ದ ಗೂಗಲ್ ನವರು ಈಗ ತಮ್ಮ ಗೂಗಲ್ ರೀಡರ್ ಸೇವೆಯನ್ನು ಜುಲೈ ೧ ಕ್ಕೆ ನಿಲ್ಲಿಸುತ್ತಿರುವುದಾಗಿ ಘೋಷಿಸಿದ್ದಾರೆ. ಜೊತೆಗೆ ಮುಳುಗಡೆ ಸಮಯವನ್ನು ಕೊಟ್ಟು ನಮ್ಮ ಎಲ್ಲಾ ಡೇಟಾ ತೆಗೆದಿಟ್ಟುಕೊಂಡು ಬೇರೆಡೆಗೆ ಸಾಗಿಸಿಕೊಳ್ಳುವ ಸೌಲಭ್ಯ ಒದಗಿಸಿಕೊಟ್ಟಿದ್ದಾರೆ. ಗೂಗಲ್ ರೀಡರ್ ನಿಲ್ಲಿಸಲು ಕೊಟ್ಟ ಎರಡು ಕಾರಣಗಳೆಂದರೆ, ಬಳಕೆದಾರರು ಕಡಿಮೆಯಾಗಿರುವುದು ಮತ್ತು ಗೂಗಲ್ಲಿನ ಹಲವಾರು ಉತ್ಪನ್ನಗಳನ್ನು ನಿಲ್ಲಿಸಿ ಕೆಲವೇ ಉತ್ಪನ್ನಗಳ ಅಭಿವೃದ್ಧಿ ಮಾಡುವುದು. ಇದರಲ್ಲಿ ಮೊದಲನೆಯ ಕಾರಣ ಅಂತಹ ನಿಜವೇನಲ್ಲ ಅನ್ನುವುದು ತಿಳಿದಿದೆ. ಏಕೆಂದರೆ ಜಗತ್ತಿನಾದ್ಯಂತ ಬಹುಸಂಖ್ಯೆಯಲ್ಲಿ ರೀಡರ್ ಬಳಕೆದಾರರಿದ್ದಾರೆ ಅಂತ ಮಾಹಿತಿಗಳು ಹೇಳುತ್ತಿವೆ. ಈ ಮೊದಲ ಒಂದೆರಡು ವರ್ಷಗಳಿಂದ ಹಂತಹಂತವಾಗಿ ಗೂಗರ್ ರೀಡರಿನಲ್ಲಿದ್ದ Like, share, share with note ಮುಂತಾದ ಸೌಲಭ್ಯಗಳನ್ನು ತೆಗೆದಿದ್ದರು. ಅವುಗಳ ಸ್ಥಾನದಲ್ಲಿ ಗೂಗಲ್ ಪ್ಲಸ್ ಇಡಲಾಗಿತ್ತು.

ನಾನು ಸುಮಾರು ಏಳು ವರ್ಷಗಳಿಂದ ಈ ಗೂಗಲ್ ರೀಡರ್ ಬಳಕೆ ಮಾಡುತ್ತಿದ್ದೆ. ಬಹಳ ಅನುಕೂಲಕರವಾಗಿಯೂ ಉಪಯುಕ್ತವಾಗಿಯೂ ಇದ್ದಂತಹ ಅಪ್ಲಿಕೇಶನ್ ಇದು. ಈಗ ಅನಿವಾರ್ಯವಾಗಿ ಬೇರೆ ದಾರಿಗಳನ್ನು ಹುಡುಕಬೇಕಾಗಿದೆ.  ಅಂತರಜಾಲದಲ್ಲಿ ಬೇರೆ ಬೇರೆ ಬ್ಲಾಗ್ ಗಳನ್ನು, ಮಿಂಬಲೆತಾಣಗಳನ್ನು, ಸುದ್ದಿತಾಣಗಳನ್ನು ಓದುವ ಅಭ್ಯಾಸ ಇಟ್ಟುಕೊಂಡ ಲಕ್ಷಾಂತರ ಜನರದ್ದೂ ಕೂಡ ಇದೇ ಪರಿಸ್ಥಿತಿಯಾಗಿದೆ. ಇದ್ದಕ್ಕಿದ್ದ ಹಾಗೇ ಬಂದೆರಗಿದ ಈ ಸುದ್ದಿಯಿಂದಾಗಿ ವೆಬ್ ಓದುಗರು  ಪರ್ಯಾಯಗಳನ್ನು ಹುಡುಕತೊಡಗಿದ್ದಾರೆ.

ಗೂಗಲ್ ರೀಡರ್ ಬಗ್ಗೆ ಗೊತ್ತಿಲ್ಲದವರಿದ್ದರೆ, ಅದನ್ನು ಹೀಗೆ ತಿಳಿದುಕೊಳ್ಳಬಹುದು. ಗೂಗಲ್ ರೀಡರ್ ಎಂಬುದು ಬೇರೆ ಬೇರೆ ಅಂತರಜಾಲ ತಾಣ(websites/blogs)ಗಳನ್ನು ಒಂದೇ ತಾಣದಲ್ಲಿ ಓದಲು ಸಾಧ್ಯವಾಗಿಸುವಂತಹ ಒಂದು ವ್ಯವಸ್ಥೆ. ಪ್ರತಿಯೊಂದು ತಾಣಗಳಿಗೂ ಒಂದೊಂದು ವೆಬ್ ವಿಳಾಸ (URL)ಇರುತ್ತದೆ. ಈ ಎಲ್ಲಾ ತಾಣಗಳ ವಿಳಾಸಗಳನ್ನು ನೆನಪಿಟ್ಟುಕೊಳ್ಳಲು ಆಗುವುದಿಲ್ಲ. ಹಾಗಂತ ಅವುಗಳನ್ನು ಬ್ರೌಸರ್ ಫೇವರಿಟ್ ನಲ್ಲಿ ಸೇರಿಸಿಟ್ಟುಕೊಳ್ಳಬಹುದಾದರೂ ಪ್ರತಿ ತಾಣದಲ್ಲಿ ಹೊಸ ಬರಹ ಹಾಕಿದ್ದು, ಸುದ್ದಿತಾಣಗಳಲ್ಲಿ ಸುದ್ದಿ update ಆಗಿದ್ದು ತಿಳಿಯಬೇಕೆಂದರೆ ಪ್ರತಿಯೊಂದು ತಾಣವನ್ನು ತೆರೆದು ನೋಡಬೇಕಾಗುತ್ತದೆ. ಕೆಲವೇ ಕೆಲವು ತಾಣಗಳು ನಮ್ಮ ಓದಿನ ಪಟ್ಟಿಯಲ್ಲಿದ್ದರೆ ಇದನ್ನು ಮಾಡಬಹುದು. ಆದರೆ ನೂರಾರು ಬ್ಲಾಗ್ ಗಳು, ವೆಬ್ ಸೈಟುಗಳನ್ನು ಈ ರೀತಿ ಮಾಡಲು ಸಾಧ್ಯವಿಲ್ಲ. ಅದೂ ಅಲ್ಲದೇ, ಹಾಗೆ ಮಾಡಿಕೊಂಡರೂ ಅದು ಆ ಕಂಪ್ಯೂಟರಲ್ಲಿ ಮಾತ್ರವೇ ಶೇಖರವಾಗಿರುತ್ತದೆ. ಬೇರೆ ಕಂಪ್ಯೂಟರ್ ಗಳಲ್ಲಿ ನೋಡಲು ಆಗುವುದಿಲ್ಲ. ಅದಕ್ಕಾಗಿ ಈ ಗೂಗಲ್ ರೀಡರ್ ಮೂಲಕ ನಮಗೆ ಬೇಕಾದ ಎಲ್ಲಾ ತಾಣಗಳ ಕೊಂಡಿಗಳನ್ನು ಹಾಕಿಟ್ಟುಕೊಂಡು ಚಂದಾದಾರಿಕೆ (subscribe) ಮಾಡಿಕೊಂಡುಬಿಟ್ಟರೆ ಎಲ್ಲಾ ತಾಣಗಳ ಎಲ್ಲಾ ಪೋಸ್ಟ್ ಗಳನ್ನು ಯಾವ  ಕಂಪ್ಯೂಟರ್ ನಲ್ಲಾದರೂ ಒಂದೆಡೆಗೇ ನೋಡಲು ಸಾಧ್ಯವಾಗುತ್ತದೆ ಮತ್ತು ಹೊಸ ಪೋಸ್ಟುಗಳು ಬಂದಾಗ ತಿಳಿಯುತ್ತದೆ. ಪ್ರತಿತಾಣವನ್ನು ತೆರೆದು ನೋಡುವುದು ಬೇಕಿರುವುದಿಲ್ಲ. ನಮ್ಮ ಜಿಮೇಲ್ ಐಡಿಯಿಂದಲೇ ಗೂಗಲ್ ರೀಡರ್ ಗೆ ಲಾಗಿನ್ ಆದರೆ ಸಾಕು. ಅದರಲ್ಲಿ ನಮ್ಮ ಇಮೇಲ್ ಅಂಚೆಪೆಟ್ಟಿಗೆಯಂತೆಯೇ ಎಲ್ಲಾ ಬರಹಗಳೂ ಕೂಡ ಕಾಣುತ್ತವೆ.  ನೇರವಾಗಿ ಅಲ್ಲಿಯೇ ಓದಬಹುದು.

ನಾನು ಸುಮಾರು ಏಳುನೂರು ಬ್ಲಾಗ್, ವೆಬ್ ತಾಣಗಳನ್ನು ಇದರ ಮೂಲಕ ಹಿಂಬಾಲಿಸುತ್ತಿದ್ದೆ. ಎಲ್ಲಾ ಬ್ಲಾಗು/ತಾಣಗಳಲ್ಲೂ ಕಣ್ಣು ಹಾಯಿಸಲು ನೆರವಾಗುತ್ತಿತ್ತು.. ವ್ಯವಸ್ಥಿತವಾಗಿ ಓದಲು ಮತ್ತು ಗುರುತಿಟ್ಟುಕೊಳ್ಳಲು ಸಾಧ್ಯವಾಗುತ್ತಿತ್ತು. ಈಗ ಗೂಗಲ್ ರೀಡರ್ ಬದಲಿಗೆ ಬೇರೆ ಯಾವುದು ಇಷ್ಟೇ ಅನುಕೂಲಕರವಾದ ಯಾವ ಬೇರೆ ಅಪ್ಲಿಕೇಶನ್ ಇವೆ ಎಂಬುದರ ಹುಡುಕಾಟದಲ್ಲಿದ್ದೇನೆ. ಈ ಬಗ್ಗೆ ಗೆಳೆಯರನೇಕರು ಕೆಲವು ಸಲಹೆಗಳನ್ನೂ, ರೀಡರಿನಂತದ್ದೇ ಸೇವೆ ಒದಗಿಸುವ ಇತರ ಕೆಲವು ತಾಣಗಳನ್ನೂ ಸೂಚಿಸಿದ್ದಾರೆ.  ಅಂತರಜಾಲದಲ್ಲಿ ನೋಡಿದರೆ ಈ ಬಗ್ಗೆ ಜಗತ್ತಿನ ಎಲ್ಲೆಡೆಯ ಬಳಕೆದಾರರಿಂದ ಜೋರು ಚರ್ಚೆಯೂ ನಡೆಯುತ್ತಿದೆ.  Best alternatives ಎಂದು ಹಲವು ತಾಣಗಳನ್ನು ಆನ್ ಲೈನ್ ಮ್ಯಾಗಜೀನ್ ಗಳು ಪಟ್ಟಿ ಮಾಡಿಕೊಡುತ್ತಿವೆ. ವಲಸೆಪರ್ವ ಶುರುವಾಗಿದೆ. ನಾನು ಸ್ನೇಹಿತರು ಸೂಚಿಸಿದ ಕೆಲವು ತಾಣಗಳನ್ನು ಪ್ರಯತ್ನಿಸಿ ನೋಡಿದ್ದೇನೆ. ಎಲ್ಲವೂ ಒಂದು ಮಟ್ಟಿಗೆ ಅಡ್ಡಿಲ್ಲ ಅನ್ನಿಸಿದರೂ ಗೂಗರ್ ರೀಡರಿನಷ್ಟು ಅನುಕೂಲಕರವೆನಿಸುತ್ತಿಲ್ಲ. ಇನ್ನೂ ಒಂದಿಷ್ಟು ತಾಣಗಳನ್ನು ಪ್ರಯೋಗಿಸಿ ನೋಡಿ ಒಂದು ತೀರ್ಮಾನಕ್ಕೆ ಬರಬೇಕಿದೆ. ಇದ್ದಿದ್ದರಲ್ಲಿ ಒಂದು ಸಮಾಧಾನದ ಅಂಶ ಎಂದರೆ ಗೂಗಲ್ ರೀಡರಿನಲ್ಲಿ subscribe ಮಾಡಿಕೊಂಡಿದ್ದ ಎಲ್ಲಾ ಕೊಂಡಿಗಳನ್ನೂ ಹೊಸತಾಣಗಳಿಗೆ ರಫ್ತು ಮಾಡಲು (export) ಅವಕಾಶವಿರುವುದು.

ಈ ಕೆಳಗಿನವು ಗೂಗಲ್ ರೀಡರಿಗೆ ಕೆಲವು ಪರ್ಯಾಯ ತಾಣಗಳು:  ಪ್ರಯತ್ನಿಸಿ ನೋಡಬೇಕು !
Cloud based: Bloglines, Old reader, NetVibes, NewsBlur, Feedly, Bloglovin, Pulse, Taptu, Pulse News
Desktop based: Feeddemon

ನೀವೂ ಗೂಗಲ್ ರೀಡರ್ ಬಳಕೆದಾರರಾಗಿದ್ದರೆ ನಿಮ್ಮ ಅನುಭವ ಏನು? ಹೊಸ ವ್ಯವಸ್ಥೆ ಏನು ಮಾಡಿಕೊಂಡಿದ್ದೀರಿ ತಿಳಿಸಿ.

ಇಷ್ಟು ವರ್ಷ ಸೇವೆ ನೀಡಿ ನಿವೃತ್ತಿಯಾಗುತ್ತಿರುವ ಗೂಗಲ್ ರೀಡರಿಗೆ ಧನ್ಯವಾದಗಳು. Miss you reader !

image: www.design-milk.com