ನಿಮ್ಮ ಗೆಳೆಯನೊಬ್ಬ ನಿಮಗೊಂದು ಆಮಂತ್ರಣ ಕೊಟ್ಟಿದ್ದಾನೆ. “ಇಲ್ಲೊಂದು ಜಾಗ ಇದೆ, ಬಹಳ ಸ್ವಾರಸ್ಯವಾಗಿದೆ, ನಾನಾಗಲೇ ಇಲ್ಲಿದ್ದೇನೆ, ನೀನೂ ಬಾ” ಅಂತ. ಅದೇನೆಂದು ನೋಡಿಬಿಡೋಣ ಅಂತ ನೀವು ಹೋಗುತ್ತೀರಿ. ಅದು ದೊಡ್ಡದೊಂದು ಕಟ್ಟಡ ಸಂಕೀರ್ಣ. ಪ್ರವೇಶ ಮಾಡುವಾಗ ನಿಮ್ಮ ಫೋನ್ ನಂಬರು ಹೆಸರು ಇತ್ಯಾದಿ ಕೊಟ್ಟು ನೋಂದಾಯಿಸಬೇಕಾಗುತ್ತದೆ. ನೋಂದಾವಣೆ ಮುಗಿಸಿ ಒಳನಡೆಯುತ್ತೀರಿ. ಒಳಗೆ ಹೋಗುತ್ತಿದ್ದಾಗ ಹಲವು ಪರಿಚಿತ ಮುಖಗಳು, ಎಷ್ಟೋ ಅಪರಿಚಿತ ಮುಖಗಳು ನಿಮ್ಮಂತೆಯೇ ಓಡಾಡುವುದನ್ನು ಕಾಣುತ್ತೀರಿ. ಆ ಕಟ್ಟಡದ ಒಳಗೆ ಬಹಳ ಕೋಣೆಗಳಿವೆ. ನೀವು ನಡೆಯುತ್ತಾ ಹೋದಂತೆ ಪ್ರತಿಕೋಣೆಯ ಒಳಗೂ ಏನೋ ಮಾತುಕತೆಗಳು ನಡೆಯುವುತ್ತಿರುವುದನ್ನು ಕಾಣುತ್ತೀರಿ. ಎಲ್ಲಾ ಕೋಣೆಗಳ ಬಾಗಿಲಿಗೂ ಇಲ್ಲಿ ಇಂತಹ ವಿಷಯದ ಬಗ್ಗೆ ಮಾತುಕತೆ ನಡೆಯುತ್ತಿದೆ ಅಂತ ಬೋರ್ಡ್ ಹಾಕಿದ್ದಾರೆ. ಮುಕ್ತಪ್ರವೇಶದ ಕೋಣೆಗಳ ಒಳಗೆ ಹೋದರೆ ಚರ್ಚೆ ನಡೆಯುತ್ತಿದೆ. ಒಂದಿಷ್ಟು ಜನ ಕುಳಿತು ಕೇಳುತ್ತಿದ್ದರೆ ಕೆಲವರು ವೇದಿಕೆಯಲ್ಲಿ ಮಾತಾಡುತ್ತಿದ್ದಾರೆ. ಒಂದು ಕೋಣೆಯಲ್ಲಿ ಕೆಲವೇ ಜನರಿದ್ದರೆ ಮತ್ತೊಂದರಲ್ಲಿ ನೂರಾರು ಜನರಿದ್ದಾರೆ. ಒಂದು ಕೋಣೆ ಹೊಕ್ಕು ಸ್ವಲ್ಪ ಹೊತ್ತು ಕೇಳಿ ಸಾಕೆನಿಸಿ ಹೊರಬರುತ್ತೀರಿ. ಮತ್ತೊಂದು ಕೋಣೆಯಲ್ಲಿ ನಿಮ್ಮಾಸಕ್ತಿಯ ವಿಷಯವೊಂದರೆ ಬೋರ್ಡ್ ಕಂಡು ಒಳಹೊಕ್ಕುತ್ತೀರಿ. ಅಲ್ಲಿ ಕೂತು ಕೇಳಿಸಿಕೊಳ್ಳುತ್ತೀರಿ. ನಿಮ್ಮ ಸ್ನೇಹಿತರನೇಕರು ಅಲ್ಲೇ ಇದ್ದಾರೆ. ನಿಮಗೂ ಏನೋ ಹೇಳಬೇಕೆನಿಸುತ್ತದೆ. ಕೈ ಎತ್ತುತ್ತೀರಿ. ಆಯೋಜಕರು ವೇದಿಕೆಗೆ ಕರೆದು ಮಾತಾಡಲು ಅವಕಾಶ ಕೊಡುತ್ತಾರೆ. ಮಾತಾಡುತ್ತೀರಿ, ಪ್ರಶ್ನೆಗಳಿಗೆ ಉತ್ತರಿಸುತ್ತೀರಿ, ಚರ್ಚೆ ನಡೆಸುತ್ತೀರಿ, ಅಲ್ಲೇ ಸಮಯಕಳೆಯುತ್ತೀರಿ. ಇಡೀ ಕಟ್ಟಡವು ಇಂತದ್ದೇ ಹಲವು ಕೋಣೆಗಳಿಂದ ತುಂಬಿದೆ. ಒಂದೇ ಆಸಕ್ತಿಯ ಜನರು ತಂಡಗಳನ್ನು ರಚಿಸಿಕೊಂಡಿದ್ದಾರೆ, ಹಲವು ವಿಷಯದ ಬಗ್ಗೆ ಕ್ಲಬ್ ಗಳನ್ನು ಮಾಡಿಕೊಂಡಿದ್ದಾರೆ. ಅವರು ಇವರ ಜಾಡು ಹಿಡಿದು ಇವರು ಅವರ ಜಾಡು ಹಿಡಿದು ಹೊರಟಿದ್ದಾರೆ. ಒಬ್ಬರನ್ನೊಬ್ಬರು ಹಿಂಬಾಲಿಸುತ್ತಾ ಇದ್ದಾರೆ. ಒಟ್ಟಾರೆ ಒಂದು ಮಾತಿನ ಕೋಣೆಗಳ ಪ್ರಪಂಚವೇ ಅಲ್ಲಿದೆ. ಇದ್ಯಾವ ಹಾಲಿವುಡ್ ಸಿನೆಮಾ ಕತೆ ಎಂದು ಯೋಚಿಸುತ್ತಿದ್ದೀರಾ? ಅಥವಾ ಈ ಜಾಗ ಜಗತ್ತಿನಲ್ಲಿ ಎಲ್ಲಿದೆ ಎಂದು ಯೋಚಿಸುತ್ತಿದ್ದೀರಾ? ಅಂತಹ ಕಟ್ಟವಾಗಲೀ ಜಾಗವಾಗಲೀ ಎಲ್ಲೂ ಇಲ್ಲ. ಆದರೆ ಇಂತಹದೊಂದು ಪರಿಕಲ್ಪನೆ ಈಗಾಗಲೇ ಸಾಕಾರಗೊಂಡಿದೆ. ಇದು ವಾಸ್ತವ ಜಗತ್ತಿನದ್ದೇ ಆದರೂ ರೂಪುಗೊಂಡಿರುವುದು ಡಿಜಿಟಲ್ ರೂಪದಲ್ಲಿ! ನಿಮ್ಮ ಸ್ಮಾರ್ಟ್ ಫೋನಿನಲ್ಲೇ ಇಂತಹ ಮಾತಿನ ಕ್ಲಬ್ ಗಳ ಜಗತ್ತನ್ನು ನಿಮ್ಮ ಅಂಗೈಗೆ ತಂದಿಟ್ಟಿರುವುದು ‘ಕ್ಲಬ್ ಹೌಸ್’ ಎಂಬ ಒಂದು ಚಿಕ್ಕ ಆಪ್!
ಕ್ಲಬ್ ಹೌಸೆಂಬ ‘ಕ್ಲಬ್ಬಿಗರ’ ತಾಣ:
ಅಂತರಜಾಲದ ನಿರಂತರ ಸಾಧ್ಯತೆಗಳ ಫಲವಾದ ಈ ಕ್ಲಬ್ ಹೌಸ್ ಈಗಾಗಲೇ ವೈವಿಧ್ಯಮಯ ಚಾಟ್ ರೂಮ್ ಗಳ ದೊಡ್ಡತಾಣವಾಗುತ್ತಲಿದೆ. ಸಮಯಮಿತಿಯಿಲ್ಲದೇ, ವಿಷಯಮಿತಿಯೂ ಇಲ್ಲದೇ ನೇರ ಮಾತುಕತೆಗಳನ್ನು ನಡೆಸಬಹುದು. ನಿಮ್ಮ ಅಂಗಳವು ಮುಕ್ತವಾಗಿದ್ದಲ್ಲಿ ಯಾರುಬೇಕಾದರೂ ಬಂದು ಕೂತು ನಿಮ್ಮ ಮಾತು ಕೇಳಿಸಿಕೊಳ್ಳಬಹುದು, ಪರಸ್ಪರ ಮಾತಾಡಬಹುದು. ಗಂಟೆಗಟ್ಟಲೇ ಕಳೆಯಬಹುದು. ಮಾತುಕತೆ ಚರ್ಚೆಗಳನ್ನು ನಿರ್ವಾಹಕರು ಚಂದವಾಗಿ ನಡೆಸಬಹುದು. ಕೇಳುಗರಿದ್ದಲ್ಲಿ ಮಾತಿನ ಮಲ್ಲರಿಗಂತೂ ಹಬ್ಬ. ರಾಜಕೀಯ ಚರ್ಚೆಯಿಂದ ಹಿಡಿದು ಧಾರ್ಮಿಕ ಪ್ರವಚನಗಳವರೆಗೆ ಎಲ್ಲದಕ್ಕೂ ವೇದಿಕೆಯಾಗಿಸಬಹುದಾದ ಈ ತಾಣದಲ್ಲಿ ಈಗಾಗಲೇ ನೂರಾರು ಸಾವಿರಾರು ಕ್ಲಬ್ ಗಳು, ತಂಡಗಳು ಇವೆ. ಇಲ್ಲಿ ‘ಅರಳಿಕಟ್ಟೆ’ಯೂ ಇದೆ, ‘ಅಡ್ಡಕಸುಬಿಗಳ ಅಡ್ಡ’ವೂ ಇದೆ. ಒಂದು ಕ್ಲಬ್ಬಲ್ಲಿ ಹಂಸಲೇಖ ಸಂಗೀತಸಾಹಿತ್ಯದ ಅದ್ಭುತ ಮಾತುಕತೆಯೂ ನಡೆಯುತ್ತಿದ್ದರೆ ಮತ್ಯಾವುದೋ ಕ್ಲಬ್ಬಲ್ಲಿ ಮಂಗಳನ ಅಂಗಳದ ಬಗ್ಗೆ ಚರ್ಚೆ ನಡೆಯುತ್ತಿರುತ್ತದೆ! ನೀವೇ ಒಂದು ಹೊಸ ಚಾಟ್ ರೂಮನ್ನೋ ಹೊಸ ಕ್ಲಬ್ಬನ್ನೋ ರಚಿಸಿ ಮಾತುಕತೆ ಶುರುಮಾಡಿಬಿಡಬಹುದು. ನಿಮ್ಮ ಪರಿಚಿತರದ್ದೇ ಒಂದು ಗುಂಪನ್ನು ಸೇರಿಸಿಕೊಂಡು ಖಾಸಗಿ ಮಾತುಕತೆಯನ್ನೂ ನಡೆಸಬಹುದು. ತೆರೆದ ಮತ್ತು ಮುಚ್ಚಿದ ಚಾಟ್ ರೂಂಗಳನ್ನು ಬಳಸಿಕೊಂಡು ನಿಗದಿತ ದಿನದಲ್ಲಿ ನಿಗದಿತ ಸಮಯಕ್ಕೆ ಇವೆಂಟುಗಳನ್ನೂ ಸಹ ಯೋಜಿಸಿಡಬಹುದು. ಒಂದು ವಿಷಯಕ್ಕೆ ಸಂಬಂಧಿಸಿದ ಕ್ಲಬ್ ಒಂದನ್ನು ರಚಿಸಿಕೊಂಡು ಅದರಲ್ಲಿ ಜನರನ್ನು ಸೇರಿಸಿಕೊಂಡು ಸಮಾನಾಸಕ್ತಿಯ ವಿಷಯಗಳ ಚರ್ಚೆ ನಡೆಸಬಹುದು. ಒದಗಿಬಂದ ಈ ಹೊಸವೇದಿಕೆಯ ಅವಕಾಶಗಳನ್ನು ಜನರು ಎಷ್ಟು ಚೆನ್ನಾಗಿ ಬಳಸಿಕೊಳ್ಳುತ್ತಿದ್ದಾರೆಂದರೆ ಈಗಾಗಲೇ ಕ್ಲಬ್ ಹೌಸಲ್ಲಿ ತರಗತಿಗಳು, ಪಾಠಗಳು, ಸಂಗೀತ ಗೋಷ್ಟಿಗಳು, ದನಿಸಾಧ್ಯತೆಗಳ ವಿಶಿಷ್ಟ ಕಾರ್ಯಕ್ರಮಗಳು ಹುರುಪಿನಿಂದ ನಡೆಯುತ್ತಿವೆ. ನಿಮ್ಮಲ್ಲಿ ಮಾತಾಡುವ ಕಲೆಯಿದೆ, ವಿಷಯ ಪರಿಣಿತಿ ಇದೆ, ಅದನ್ನು ಜನರ ಮುಂದಿಡಲು ಗೊತ್ತಿದೆ ಅಂತಾದಲ್ಲಿ ನಿಮ್ಮ ಕೇಳುಗವರ್ಗಕ್ಕೆ ಕೊರತೆ ಇಲ್ಲ. ಬರಹರೂಪದಲ್ಲಿ ಸಂಪೂರ್ಣವಾಗಿ ಅಭಿವ್ಯಕ್ತಿಸಲಾಗದ ವಿಷಯಗಳನ್ನು ನೇರಮಾತುಗಳ ಮೂಲಕ ತೆರೆದಿಡುವ ಅವಕಾಶ ಇಲ್ಲಿದೆ.
ಇಷ್ಟು ಮುಕ್ತ ಸೌಲಭ್ಯಗಳಿರುವಾಗ ಇದರಿಂದ ಕೆಡುಕು ಇಲ್ಲದಿದೆಯೆ? ಖಂಡಿತ ಇದೆ. ಮಾತುಕತೆ ಅಂದಮೇಲೆ ಅಲ್ಲಿ ವಾದವಿವಾದಗಳಾಗುವುದು, ಕೆಸರೆರೆಚಾಟಗಳು ಸಾಮಾನ್ಯ. ಅದು ವಿಪರೀತಕ್ಕೆ ಹೋಗುವುದೂ ಇದೆ. ಇದು ಲೈವ್ ಮಾತುಕತೆಯಾದ್ದರಿಂದ ಇದರ ಆಡಿಯೊಗಳು ದಾಖಲಾಗಿ ಉಳಿಯುವುದಿಲ್ಲ. ಮಾತುಗಳಿಗೆ, ಪದಬಳಕೆಗಳಿಗೆ ಯಾವ ಫಿಲ್ಟರ್ ಇಲ್ಲ. ಇದಕ್ಕೆ ಬೇಕಾಗಬಹುದಾದ ಕಾನೂನುಗಳು ವಿಸ್ತೃತವಾಗಿ ರೂಪುಗೊಂಡಿಲ್ಲ. ಹಾಗಾಗಿಯೇ ಕೆಲ ದೇಶಗಳು ನಿಷೇಧ ಹೇರಲು ಹೊರಟಿವೆ. ಬೇರೆಲ್ಲಾ ಸಾಮಾಜಿಕ ಜಾಲತಾಣಗಳಂತೆ ಇದನ್ನು ಎಷ್ಟು ಸೃಜನಾತ್ಮಕವಾಗಿ, ಮಾಹಿತಿಪೂರ್ಣ, ಒಳ್ಳೆಯ ಕೆಲಸಗಳಿಗೆ ಬಳಸಬಹುದೋ, ಹಾಗೆಯೇ ಸಮಾಜದ್ರೋಹಿ, ದೇಶದ್ರೋಹಿ ಕೆಲಸಗಳಿಗೆ ಬಳಸಿಕೊಳ್ಳಬಹುದಾದ ಎಲ್ಲಾ ಸಾಧ್ಯತೆಗಳೂ ಇವೆ ಎಂಬುದು ತಜ್ಞರ ಅನಿಸಿಕೆ.
ಕಷ್ಟಗಳು ನೂರಾಹನ್ನೊಂದು, ಬೇಕಾ ಮತ್ತೊಂದು?
ಇದೆಲ್ಲಾ ಕಾನೂನಾತ್ಮಕ ವಿಷಯಗಳಾದರೆ ಇಲ್ಲಿ ಮುಖ್ಯ ಸವಾಲು ನಮ್ಮ ವೈಯಕ್ತಿಕ ಸಮಯ ಮತ್ತು ತೊಡಗುವಿಕೆಯದ್ದು.. ಈಗಾಗಲೇ ಸೋಶಿಯಲ್ ನೆಟ್ವರ್ಕುಗಳ ವಿಪರೀತ ಬಳಕೆಯಿಂದ ಜನರ ಅಭಿರುಚಿ ಆಸಕ್ತಿಗಳು ಬದಲಾಗುತ್ತಿವೆ, ಹಲವರು ಹೆಚ್ಚಿನ ಸಮಯವನ್ನು ಅಲ್ಲೇ ಕಳೆಯುತ್ತಿದ್ದಾರೆ, ಎಷ್ಟೋ ಜನ ವ್ಯಸನಕ್ಕೆ ಒಳಗಾಗಿದ್ದಾರೆ. ಜೀವನಕ್ಕೆ ಮತ್ತು ಜೀವಕ್ಕೆ ಅಪಾಯ ತಂದು ಕೊಂಡಿದ್ದಾರೆ. ಇಷ್ಟೆಲ್ಲಾ ಆದಮೇಲೂ ಮತ್ತೆ ಇಂಥದ್ದೊಂದರಲ್ಲಿ ತೊಡಗಬೇಕಾ ಎಂಬ ಪ್ರಶ್ನೆಗೆ ನಾವೇ ಉತ್ತರ ಕಂಡುಕೊಳ್ಳಬೇಕಾಗಿದೆ. ಫೇಸ್ಬುಕ್, ಟ್ವಿಟ್ಟರ್ ಮುಂತಾದ ತಾಣಗಳಿಗಿಂತ ಇದು ನಮ್ಮ ಹೆಚ್ಚಿನ ಸಮಯವನ್ನು ಕೊಲ್ಲಬಲ್ಲುದು ಎಂಬ ಅಭಿಪ್ರಾಯ ಈಗಾಗಲೇ ಬರುತ್ತದೆ. ನಮಗೆ ಬೇಕಾದ ವಿಷಯಗಳ ಬಗ್ಗೆ ನಮಗೆ ಬೇಕಾದಷ್ಟೆ ಸಮಯವನ್ನು ಬಳಸಿಕೊಂಡು ತಿಳಿದುಕೊಳ್ಳಬೇಕಾದ ವಿಷಯಗಳನ್ನು ಬರಹ ಮುಂತಾದ ರೂಪಗಳಲ್ಲಿ ತಿಳಿದುಕೊಳ್ಳಲು ಮತ್ತು ಸಂವಹನಗಳನ್ನು ಮಾಡಲು ಸೌಲಭ್ಯಗಳಿರುವಾಗ ಹೀಗೆ ಮಾತುಗಳನ್ನು ಕೇಳುತ್ತಾ ಕೂರಲು, ಹರಟೆ ಹೊಡೆಯಲು ಸಮಯ ವ್ಯರ್ಥ ಮಾಡುವುದು ಸಮಂಜಸವೇ ಎಂದು ಹಲವರು ಕೇಳುತ್ತಿದ್ದಾರೆ. ಎಚ್ಚೆತ್ತುಕೊಂಡ ಹಲವರು ಕ್ಲಬ್ ಹೌಸ್ ತೊರೆದುಬಂದಿದ್ದಾರೆ. ಕ್ಲಬ್ಬು ಪಬ್ಬಲ್ಲಿ ಕಾಲ ಕಳೆಯುವುದಕ್ಕಿಂತ ಈ ಕ್ಲಬ್ ಹೌಸಲ್ಲಿ ಕಾಲಕಳೆಯುವುದು ಎಷ್ಟೋ ಚೆನ್ನ ಎಂಬುದೂ ಹಲವರ ಸಮರ್ಥನೆ. ಜಗತ್ತು ಈಗ ಆಯ್ಕೆಗಳ ಆಗರ. ವೇದಿಕೆಗಳ ಸಾಗರ. ಇದರಲ್ಲಿ ನಮಗೆ ಯಾವುದು ಎಷ್ಟು ಯಾಕೆ ಬೇಕು ಎಂಬ ನಿರ್ಧಾರ ನಮಗಿರಬೇಕಷ್ಟೆ.
ನಮ್ಮ ಡಿಜಿಟಲ್ ಜಾಡು ಹಲವರ ಕೈಯಲ್ಲಿ:
ಈಗಾಗಲೇ ನಮ್ಮ ಡಿಜಿಟಲ್ ಹೆಜ್ಜೆಗುರುತುಗಳನ್ನು ಹಲವೆಡೆ ಹಲವು ರೀತಿಯಲ್ಲಿ ಅನಿವಾರ್ಯವಾಗಿ ನಾವು ಬಿಟ್ಟುಕೊಡುವ ಸಂದರ್ಭವಿರುವಾಗ ಈ ಆಡಿಯೋ ತಾಣವು ನಮ್ಮ ದನಿಯ ಮಾದರಿಯನ್ನೂ ಸಂಗ್ರಹಿಸಿ ಬಳಸಿಕೊಳ್ಳುವ ಆತಂಕ ಇಲ್ಲದಿಲ್ಲ. ಕೋಟ್ಯಂತರ ಜನರ ಈ ಆಡಿಯೋ ಮಾದರಿಗಳು ಒಂದು ದೊಡ್ಡ ಡೇಟಾ ಸಂಶ್ಲೇಷಣೆಗೆ ಭಂಡಾರವಾಗಲಿದೆಯಾ ಎಂಬ ಪ್ರಶ್ನೆಯನ್ನೂ ತಜ್ಞರು ಅಲ್ಲಗಳೆಯುತ್ತಿಲ್ಲ. ಕ್ಲಬ್ ಹೌಸಿನ ಮಾತುಕತೆಗಳನ್ನು ರೆಕಾರ್ಡ್ ಮಾಡುವಂತಿಲ್ಲ, ಪಠ್ಯರೂಪದಲ್ಲಿ ತರುವಂತಿಲ್ಲ, ಮರುಪ್ರಸಾರ ಅಥವಾ ಹಂಚುವಿಕೆಗೆ ಅವಕಾಶವಿಲ್ಲ ಎಂಬ ಶರತ್ತುಗಳಿವೆ. ಆದರೆ ಬಳಕೆದಾರರ ಮಾಹಿತಿಯನ್ನು ಬಳಸಿಕೊಂಡು ಅದನ್ನು ಮಾರ್ಕೆಟ್ ಮಾಡಿಕೊಳ್ಳುವ ಅವಕಾಶಗಳಂತೂ ಇದೆ. ಇಷ್ಟರಲ್ಲೇ ಪಾವತಿಸಿ ಬಳಸುವಂತಹ ಹೆಚ್ಚು ಸೌಲಭ್ಯಗಳ ಚಾಟ್ ರೂಂಗಳನ್ನೂ ಒದಗಿಸುವ ಯೋಜನೆಯನ್ನೂ ಕ್ಲಬ್ ಹೌಸ್ ಮಾಡಿರುವುದಾಗಿ ಮಾಹಿತಿಗಳಿವೆ. ಒಟ್ಟಾರೆ ಕ್ಲಬ್ ಹೌಸಿನ ಪಾರ್ಟಿಗಳು ಜೋರಾಗಿ ಶುರುವಾಗಿರುವುದಂತೂ ಹೌದಾದರೂ ಈ ಕ್ಲಬ್ ಹೌಸ್ ಮುಂದಿನ ದಿನಗಳಲ್ಲೂ ಇದೇ ಆಕರ್ಷಣೆ ಉಳಿಸಕೊಂಡು ಬೆಳೆಯಲಿದೆಯಾ ಎಂದು ಕಾದುನೋಡಬೇಕಿದೆ.
-ವಿಕಾಸ್ ಹೆಗಡೆ
೨೭ಜೂನ್ ೨೦೨೧ ರ 'ವಿಜಯ ಕರ್ನಾಟಕ ' ಪತ್ರಿಕೆಯ ಸಾಪ್ತಾಹಿಕ‌ಕ್ಕೆ ಬರೆದಿದ್ದು.
